PM Taur Foti Alkatraun Ba Teste iha Labnas

husi -62 views

Timor Post (05/03/2021)—Primeiru Ministru (PM), Taur Matan Ruak, akompaña Ministru Obras Publikas (MOP) Salvador Pires, Prezidente Câmara Comercio Indústria Timor-Leste (CCI-TL) Oscar Lima, tékniku MOP no Ajénsia Dezenvolvimentu Nasionál (ADN), Sesta (5/3) foti alkatraun Estrada Diresaun Balidi ba teste iha laboratóriu nasionál hodi halo amostra.

“Ohin ha’u mai akompaña halo teste ba produtu Timor Roads nianho ita nia konvensionál, ne’ebé ha’u kontente loos ida ha’u hare kualidade ne’ebé mak iha maski nia rezultadu orasida laboratóriu mak deside”, Taur hatete iha entrevista ho jornalista sira iha terenu sesta (05/03).

Eis prezidente da Repúblika espresa sentimentu kontente koko direta kualidade produtu Timor Roads nian ho pasta nu’udar Primeiru Ministru.

“Ha’u uluk Prezidente ha’u hatene mak kritika maibé ha’u nunka sente oinsá mak sira halo sofrementu sakrifísiu atu hadi’a ita nia estrada sira ne’e, entaun iha forma ida ha’u mós hanesan simplizadu hare buat ne’ebé mak sira halo”, hateten PM.

Xefe Governu deklara alkatraun diresaun refere uza durante tinan 8 ona maibé foin halo teste tanba hanesan produtu foun ne’ebé mak introdús iha rai laran dezde governu anterior.

“Interesadu loos, labele husik buat ne’ebé mak governu anterior halo hodi halai ketak tanba buat sira ne’ebé mak halo sira halo ho intensaun di’ak ka razaun ruma, entaun buka hodi hatene. Ne’ebé ita hare to’ok rezultadu teste laboratóriu ida ne’e, naturalmente tékniku sira sei hatete no fó rekomendasaun pasu saida mak ita sei hola iha tempu oin mai, agora atu dehan uza buat ne’ebé mak lalais ekonómiku no efisiente kualidade di’ak ne’e di’ak liu ba nasaun ida ne’e”, revela Xefe Governu.

Eis Segundu Komandante Komandu Luta Libertasaun Nasionál nian apelu emprezáriu aban bain rua hetan projetu karik labele hatene mak krítiku de’it, maibé tenke rekoñese servisu ne’ebé mak sira halo.

Tuir Taur katak intervensaun ema nia ho hanoin ida kualidade ne’e importante, tanba ne’e la’ós di’ak deit ba nasaun maibé di’ak ba povu tomak, tanba buat ne’ebé mak ita gasta halo agora bele to’o iha ita nia oan sira.

Matan Ruak antesipadamente louva produtu Timor Roads maski sidauk fó sai rezultadu teste iha laboratóriu nasionál.

“Ida ne’e sai ezemplu di’ak ida tanba estrada iha fatin ne’e uza tinan barak ona maibé nunka nakfera no kuak, sera ké fatin ne’e uluk nakonu ho bee de’it no kanku laran, kompara ho estrada sira seluk iha rai maran kuak arbiru no nakfera hotu, entaun ida ne’e sai ezemplu di’ak”, hatutan TMR.

Molok hakotu PM husu ba emprezáriu sira hotu servisu hamutuk ho governu hodi asegura kualidade hodi hadi’a kredibilidade, prestíjiu naran di’ak tanba laiha emprezáriu ida mak hakarak ema ko’alia at sira.

Entretantu iha fatin hanesan Prezidente CCI-TL Oscar Lima apresia katak prezensa PM nian direta iha terrenu hatudu ninia simplisidade no sai ezemplu ba ema hotu.

“Primeiru Ministru mai rasik ne’e buat ida di’ak tebes tun mai iha terenu hatudu nia simplisidade hatudu ezemplu di’ak ba ita hotu”, louva Oscar Lima hodi hein rezultadu teste hosi laboratóriu.

Jornalista : Jaime Pires
Editor : Mariano Martins