PLP Adia Kongresu Nasionál

by -182 views
Maria Angelina Sarmento Lopes

Jornalista José Caet / Editór Noémio Falcão

DILI (Timor Post)— Vise-Prezidente Partidu Libertasaun Popular (PLP), Maria Angelina Sarmento Lopes informa, loloos nia parte realiza kongresu nasionál iha fulan Outubru tinan ne’e nia laran, maibé adia tanba rajaun atake COVID-19.

Maria dehan, liuhusi kongresu nasionál maka deside kandidatu husi PLP ba Prezidente Repúblika periodu 2022-2027.

Nia hatete, maski informasaun espalla tiha ona katak, prezidente partidu libertasaun popular sei la avansa, atu kompete iha festa demokrasia maibé desizaun final iha kongresu.

“Ha’u hanoin asuntu ne’e, ha’u labele pronunsia, tanba ne’e sei liuhosi desizaun iha kongresu nasionál,” Maria ba Timor Post iha resintu Parlamentu Nasionál, Kuarta (08/09).

Entretantu nia mos subliña, maski antes ne’e, joven no grupu barak propoin tiha ona espoza primeiru ministru Isabel Ferreira, atu kandidatu ba eleisaun prezidensiál períodu 2022. Maibé desizaun iha kongresu nasionál.

Tanba to’o agora mós estrutura partidu refere seidauk ko’alia, atu deside ninia kandidatu rasik, hodi kompete iha eleisaun tinan 2022.

Atu dehan ema individual atu kandidatu ba prezidente repúblika, hanoin konstituisaun fó dalan, maibé partidu deside atu fó apoiu ba se-se too agora seidauk iha desizaun. (Lee notísia seluk iha Jornal Timor Post)

No More Posts Available.

No more pages to load.