Planu Viajen ba Roma-Portugal-Amérika, Ramos Horta husu Lu-Olo Túr Hakmatek

by -1.068 views
José Manuél Ramos Horta

Jornalista Luis Casimiro Lopes / Editór Noémio Falcão

Manufahi (Timor Post)—Tuir planu, iha loron 13/09/2021, Prezidente Repúblika Francisco Guterres Lú Olo ho nia delegasaun hala’o viajen estadu ba New York-Estadu Unidus Amérika (EUA) hodi partisipa asembleia jeral nasoin unidas (United Nations General Assembly).

Durante semana ida iha rai liur, Xefe Estadu sei vizita mós Itália-Roma no Lisboa-Portugal.

Maske nune’e, liga ho problema moras daet COVID-19 ne’ebé mundu infrenta, Premiadu Nobel da Paz nu’udar mos eis Prezidente Repúblika, José Manuél Ramos Horta husu ba Lú Olo atu kansela tiha viajen.

Horta dehan, nia la fiar Lu Olo ba Amérika Prezidente Joe Biden hakarak hasoru malu.

“Tinan ida ne’e defisil tebes-tebes laiha physical presence ka laiha xefe estadu ba Organizasaun Nasões Unidas (ONU) tanba COVID-19 sei ameasa bo’ot,” Diplomata Senior ne’e subliña ba Jornalista sira bainhira hala’o viajen ba Manufahi, Kinta (19/08/2021).

Tanba ne’e,  Horta hatutan, Lu-Olo lalikan gasta tempu sai ba rai liur no túr hakmatek de’it.

“Avo Lu-Olo agora katuas no beioan iha ona di’ak liu túr hakmatek hodi haree beioan sira. Duke sa’e aviaun ba halo saida iha rai liur ne’eba,” Horta hatete.

Entretantu Prezidente Repúblika Francisco Guterres Lu Olo, iha loron 16/08/2021 adia nia viajen ba Munisípiu Ainaro no Manufahi tanba rajaun moras.

No More Posts Available.

No more pages to load.