Plaka Memoriál Harii iha Sede UDT

by -200 views
Tenente Jeneral Lere Anan Timur

DILI (Timor Post)—Aniversáriu Loron FALINTIL ba dala 46 ne’ebé realiza iha loron 20 fulan Agostu, FALINTIL-Forsa Defeza Timor-Leste (F-FDTL), liuhosi programa tour FALINTIL dalan ba dame, tau plaka memorial iha Sede UDT, hodi hanoin hikas baze hahú funu iha Timor-Leste.

Tuir Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, konsidera fatin ne’ebé agora daudaun hanesan sede UDT ne’e hanesan fatin istóriku, tanba hosi fatin ida ne’e mosu movimentu 11 Agostu 1975.

“Agradese tanba bele simu ami iha fatin no sede UDT, fatin istóriku ba ita-nia povu no ba própriu UDT rasik, entaun ba loron ida ne’e, bele simu ami-nia baze ne’ebé istóriku, Palapasu iha ne’e maka hahú funu iha Timor-Leste, tanba saida, tanba mosu Guerra Sivíl,” nia hatete iha Sede UDT, Palapasu, Domingu (15/08).

“Iha Palapasiu ami tau plaka ida ne’e hanesan primeiru komandu operasionál UDT nian, plaka ida, ami sei tau tan plaka ida hanesan segunda baze operasionál UDT nian,” nia hatutan.

Nia esplika, hosi tour FALINTIL ne’e atu memoriza fatin istória, atu fó hanoin ba jerasaun ikus, kona-ba ninia avó, ninia aman sira uluk mate iha ne’ebá.

Tuir Lere katak, konta istória tenke konta ba oin, dala-ruma iha hanoin sala, tanba se laiha pasadu, ita lahatene prezente, se laiha prezente ita sei la harii futuru.

Nia konta, iha luta uluk nian, hotu-hotu iha objetivu ida de’it, maibé dalan maka ketak-ketak, tanba haksesuk malu ba dalan ketak-ketak ne’e hodi hamosu UDT oho FRETILIN, depois kontra Golpe, depois FRETILIN ho UDT.

“Ate agora iha estrada ita hasoru malu ita ko’alia istória uluk FRETILIN oho ida ne’e, maibé ita-nia governu seidauk formaliza loloos, situasaun polítika ne’ebé la’o,” nia kestiona.

Uluk mós nia dehan, akontese FRETILIN ho FRETILIN mosu diverjénsia no deferénsia hodi rezulta FRETILIN ho FRETILIN oho malu.

“Ita hotu hatene, FRETILIN na’in hira maka mate ba inesperiénsia lideransa nian maturidade polítika, infantalizmu polítiku, autoritarizmu, militarizmu, tanba prosesu ida ne’e,” nia finaliza.

Iha fatin hanesan Membru Konsellu Polítiku Nasionál UDT Florentino Sarmento, sente onra boot ba UDT, tanba bele koloka plaka ida iha Palapasu.

“Ha’u saúda ba inisiativa vossa exelénsia, señór Jenerál, onra boot ba ami, UDT, simu ita boot, iha sede partidu ami nian, iha Palapasu, fatin istóriku, nakonu ho memórias, tanba hosi fatin ida ne’e mosu movimentu 11 Augusto 1975.

“Onra boot ida tan atu mós partisipa iha tour ida ne’e, liuhosi hari plaka ne’ebé marka ami-nia kompromisu ba pás, demokrasia no direitus umanus,” nia hatete.

Nia konta, UDT, primeiru partidu polítiku ne’ebé hari iha timor hafoin revolusaun 25 Abríl 1974 iha Portugal, defende intranzijentemente integridade territorial país nian, no nia povu.

“Ami bele afirma ho orgullu katak durante tinan 24 rezisténsia kontra okupasaun Indonesia, UDT partisipa nafatin ativamente iha frente hot-hotu, Frente Armanda, frente klandestina, no Frente diplomata,” nia hakotu. (ven)

No More Posts Available.

No more pages to load.