Pessoal Seguransa Menus, Negosiante Merkadu Taibessi Aproveita Loron Rua

by -273 views
Negosiante obralan inklui modo tahan, uza fatin estasionamentu iha merkadu Taibesi hodi halo negósiu. Foto TP/Amélia Babo

DILI (Timor Post)-Iha loron Sábadu no Domingu sai loron espesiál ba negosiante sira iha merkadu Taibesi hodi fa’an sira nia sasán iha karreta para fatin (estasionamentu).

Sasán ne’ebe sira fa’an iha estasionamentu, mak hanesan modo tahan, ai-fuan fresku inklui roupa obralan no mós sasán dapur nian.

Negosiante roupa obralan, Matilda Fatima, hatete sira uza fatin estasionamentu ne’e iha loron Sábadu ho Domingu de’it, la’ós permanente.

“Ami uza fatin ne’e provizoriu deit, iha loron Sábadu ho Domingu hodi fa’an sasán iha ne’e, ami la’ós permanente. Ami fa’an sasán iha laran, ema ladún ba sosa roupa entaun susar ba ami atu hetan rendimentu hodi sustenta ami nia família uma laran,” Matilda hateten ba Timor Post, iha Merkadu Taibesi, Sábadu (13/11).

Negosiante sira aproveita loron Sábadu ho Domingu hodi hala’o sira nia negosiu iha karreta para fatin tanba pesoal seguransa iha merkadu refere ferias, sira la tama servisu, entaun sira aproveita hodi hetan lukru oituan.

“Tanba ita hela iha Dili ne’e vida karun, buat hotu ho osan maka foin bele hetan, foin sente moris ne’e vale ba ita, tanba buat ki’ik-boot ho osan, se osan laiha difisil ba ita,” nia dehan.

Entretantu, Koordenadór Merkadu Taibesi, Antonio Manuel de Araújo, hatete negosiante sira ne’ebé halo negósiu iha fatin estasionamentu ne’e, laiha koñesimentu husi koordenadór merkadu nian.

“Ami bandu negosiante labele halo negósiu iha fatin ne’eba, tanba fatin ne’e transporte públiku; hanesan angguna, bis, baskulante sira mai husi munisípiu para fatin, nune’e mos mikrolete no taxi sira halai iha Dili laran ne’e,” Antonio hateten.

Tanba ne’e, nia promete, hahú Segunda ba oin, sira sei muda negosiante sira ne’ebé uza fatin públiku ne’ebé estadu bandu, ba fa’an hotu iha merkadu laran.

“Ami haruka negosiante ida-idak ba hala’o negósiu iha fatin ne’ebé antes ne’e sira fa’an ba. Ita hotu hakru’uk ba regra ne’ebé maka iha ona, labele halo negósiu, signifika fatin ne’e iha nia funsaun no fatin refere utiliza ba transporte públiku hodi para,” nia dehan.

Antonio afirma, governu prepara ona fatin ba negosiante sira hodi fa’an sasán, fa’an iha merkadu laran. Tanba ne’e negosiante sira labele fó razaun oi-oin.

Kona ba pesoal seguransa sira la tama servisu iha loron Sabadu ho Domingo, nia dehan, ne’e tuir lei funsaun publiku nian, entaun iha loron rua ne’e laiha pesoál seguransa ruma mak tama hodi kontrola atividade iha merkadu.

Tanba ne’e, nia husu ba Prezidente Autoridade Munisipiu Dili atu rekruta tan pesoal seguransa foun, nune’e bele reforsa servisu iha terenu, liuliu iha loron Sábadu ho Domingu nian.

Portantu, seguransa iha parte loron, iha ema nain lima no kalan iha ema na’in lima, ne’e difisil atu kontrola ho masimu, tanba negosiante barak liu. (asb)

No More Posts Available.

No more pages to load.