Pasiente Fase Raan Nadodon no Preokupa Atendimentu iha HNGV, Doutór Flávio Rekoñese Médiku balun Tama Kuarentena no Izolamentu

by -125 views

Timor Post (18/03/2021)—Pasiente hemodialisa ka fase raan kuaze atus ida preokupa atendimentu médiku sira nian iha Hospital Nacional Guido Valadares (HNGV) ne’ebé ikus ne’e ladun efetivu.

Pasiente fase raan ida ne’ebé ho sira seluk ba hein hela médiku sira iha HNGV, ohin ba Timor Post hatete, pasiente balu maka loron hirak liu ba seidauk fase Raan no nia rasik dader de’it ba hein ona maibé médiku laiha.

“Médiku sira dehan tama kuarentena hotu. Problema mak ne’e, sira na’in hira horiseik dehan fase mas la fase, agora ami ida ohin dehan fase ne’e la fase,” pasiente ne’ebé lakohi temi nia identidade ne’e preokupa.

Nia dehan, kompriende ho situasaun atuál atendimentu médiku sira ba moras daet COVID-19, maibé sira mós presiza hetan atensaun tanba moras ne’ebé sira infrenta mós ameasa tebes ba sira nia vida.

Pasiente ne’e hatutan, sira hato’o preokupasaun ne’e la’ós kontra médiku sira tanba sira konsidera médiku sira hanesan sira nia Maromak, maibé ho situasaun dadauk ne’e sai ameasa tebes ba sira nia vida.

Entretantu Diretór Klínika HNGV, Doutór Flávio Brandão ba Timor Post hatete, nia parte konsiente ho preokupasaun husi pasiente sira ne’e.

Rajaun ne’ebé iha maka Doutór Flávio haktuir, iha duni médiku balu maka tenke ba kumpri kuarentena no izolamentu tanba afeta mós moras daet COVID-19.

“Inkonvinete ita atu hatete katak funsionamentu iha hemodialisa kontinua la’o. Maibé presiza mós kumpriensaun husi pasiente sira,” Doutór Flávio hatete.

Nia informa, horikalan nia parte halo hela atendimentu ba pasiente sira, maibé rekoñese katak ohin seidauk halo atendimentu tanba sei hamoos hela fatin fase raan ne’ebé horikalan uza ona.

Observasaun Timor Post haktuir, pasiente sira dezde dader ba hein ona iha HNGV maibé to’o notísia ne’e públika seidauk hetan fali informasaun kona-ba atendimentu husi médiku ba pasiente hirak ne’e.

Jornalista Olga Soares

Fotógrafu Maria Lízia

Editór Noémio Falcão

No More Posts Available.

No more pages to load.