Pasiente COVID-19 Sa’e ba Na’in-9: Alkatiri Lansa Krítika Hasoru Ukun Nain Feriadu iha Tempu Krize

by -98 views
Foto: Neon Metin

Timor Post (26/12/2020)—Eis Primeiru Ministru atual Sekretáriu Jerál FRETILIN, Marí Bim Amude Alkatiri lansa kritika hasoru ukun nain sira ne’ebé feriadu iha tempu krize.

Alkatiri foti kestaun ne’e tanba preokupa ho Timor Leste rejista hikas pasiente moras daet COVID-19 iha loron 24/12/2020, sa’e ba ema na’in-9 inklui na’in-3 iha Oekusi.

“Dahuluk liu maka COVID-19 pozitivu iha Timor Leste sa’e ba bei-beik. Agora iha tempu festa. Maibé ita tenki brani desidi “lock down”. La’ós tempu ba férias ba titulares Órgãos de Soberania,” Alkatiri hakerek iha nia Pájina offisiál Facebook.

Alkatiri hatutan, ho situasaun atuál tempu ba desizaun atu “lock down”. Hotu-hotu tenki hela iha uma. Konfinamentu. Máskara no distansiamentu sosial.

“Sé maka ukun, ukun oras 24 lor-loron no ba loron 365 tinan-tinan. Férias bainhira la iha krizi. Biar nune’e ukun nain labele izola-an. Tenki prontu oras 24 loron-kalan. Ne’e maka ita bolu sentido de responsabilidade,” Alaktiri afirma,” Alkatiri salienta.

Entretantu Primeiru Ministru Taur Matan Ruak, iha loron 22/12/2020, foti ferias to’o loron 04/01/2020.

Taur goza feriadu ne’e bazeia ba lei haktuir kada tinan funsionáriu públiku no privadu to’o titular órgaun soberania sira iha direitu ba ferias durante loron 12.

Iha loron 24/12/2020, Ministériu Saúde deklara Timor Leste rejista hikas ema na’in-9 pozetivu ba moras daet Corona (COVID-19). Husi númeru kazu ne’e, hotu-hotu importadu, katak seidauk iha trasmisaun lokal.

Ministra Saúde Odete Maria Freitas Belo haktuir, ema na’in-9 ne’e, na’in-3 izola ona iha Oekusi no seluk iha ona Sentru Izolamentu Vera Kruz, Dili.

“Kazu aumenta, fulan dezembru ita iha kazu 9, entaun aumenta kazu ne’ebé mak iha ita kuidadu tebetebes tanba ha’u tenki halo jestaun didi’ak. Maske kazu sira ne’e asimptomatik maibé dalaruma mós tanba de’it kazu asimptomatik entaun ita dehan ema lata’uk, hanoin dehan buat ne’e bosok tanba sira rasik lasenti moras. Iha laboratóriu hatudu katak pozitivu maibé ninia síntomas ne’e kuandu laiha entaun ema senti dehan ida ne’e laiha problema,” Ministra Odete hatete iha konferénsia ba imprensa, iha Salaun SAMES.

Maromak La Dook, Buat Ida De’it Mak La’e!

“Maske pandemia ne’e, ita nia Maromak la’ós Maromak ida ne’ebé dook, Nia, Maromak ida ne’ebé besik mai ita, akompaña ita, la’o ho ita, sai ida de’it ho ita. Buat ida de’it maka la’e, “sala”. Ida ne’e mak rajaun mai ita iha solinidade natal, sai selebrasaun ida ita dehan katak, selebrasaun ksolok, naroman no esperansa,” Arsebispu Metropolitanu Dili, Don Virgílio do Carmo da Silva, SDB.

Iha omília ba selebrasaun Kalan Natal iha Igreja Katedral, Dili, Don Virgílio subliña, mensajen Amu Papa nian iha tinan ida ne’e iha mundu selebra natal la hanesan baibain, maibé iha Timor Leste sarani sira tenke ho fiar metin katak Maromak sei la dook. (cao)

No More Posts Available.

No more pages to load.