Pasiente COVID-19 Sa’e ba 18: Na’in-6 Rekopera, 406 hein Rejultadu Teste

by -144 views

Timor Post (04/01/2021)—Pasiente ba moras daet Corona (COVID-19) aumenta tan na’in-3, sura hamutuk ho na’in-15 ne’ebé rejista iha loron Domingu (03/01/2021) sa’e ba na’in-18, maibé rekopera fali na’in-6, total pasiente ne’ebé agora iha sala izolamentu na’in-12 inklui na’in-3 iha Oekusi.

Koordenadora Jerál COVID-19 Odete Vegas informa liuhusi konferénsia imprensa ne’ebé realiza iha Salaun Ministériu Saúde (MS), Kaikoli, Segunda (04/01/2021) lokraik tuku rua.

Nia dehan, Ministériu Saúde kontinua alerta ba públiku, presiza kuidadu saúde hodi halo tuir regra estadu emerjénsia nian tanba kada loron kazu pozitivu kontinua aumenta.

“Dadus kumulativu teste hamutuk 16.885, sira ne’ebé sei hein rezultadu hamutuk 406, kazu pozitivu 49, totál rekuperadu 37, kazu foun 3, pasiente ne’ebé sei baixa hamutuk 12, rezultadu negativu hamutuk 16.430 no ema ne’ebé sei iha kuarentena hamutuk 313 no totál abitante ne’ebé pasa ona husi periodu kuarentena hamutuk 6.974,” Odete haktuir.

Nia subliña, pasiente foun tolu ne’e hotu mane ne’ebé ida ho idade 19, 29 no 43, mai hamutuk husi UK.

“Pasiente ida ho idade 19 ne’e viajem husi UK mai Timor-Leste iha loron 21 Dezembru no to’o iha Dili iha loron 22 Dezembru hamutuk ho pasajeiru 100 no sira na’in 14 mak halo kuarentena iha Ótel Vila-Verde depois hetan katak sidadaun ne’e pozitivu ba COVID-19. Alende ne’e Pasiente rua seluk viajem husi UK Mai TL iha 20 Dezembru to’o iha Dili iha 22 Dezembru depois ba kuarentena iha Ótel Time square Fatuhada,” dehan Odete.

Diretora Jerál Prestasaun Saúde (JDPS) ne’e mós husu ba públiku atu koopera, kolabora no nafatin tau fiar mai Ministériu Saúde hodi bele hala’o ninia kna’ar tuir padraun, labele pániku, kumpri nafatin regras estadu emerjensia ne’ebé governu dekreta ona no medida preventiva tuir protokolu MS no Organizasaun Mundiál Saúde (OMS) fó sai ona.

Jornalista: Jaime Pires

Editór: Noémio Falcão

No More Posts Available.

No more pages to load.