Pasajeirus Kuaze Atus Rua Kuarentena ona iha Hotel Audian no Novo Horizonte

by -202 views

DILI—Pasajeirus kuaze atus rua ne’ebé tama husi fronteira rai Batugade no semo ho Aviaun Sriwijaya, Citilink husi Bali ho Aviaun Royal Bhutam Airlines, husi Singapura, governu liuhusi autoridade kompetente sira lori kedas ba karantina iha Hotel Audian ho Novo Horizonte, iha Metiaut, Dili, durante loron 14.

Pasajeirus sira tama husi fronteira rai husi Batugade hamutuk 79 koloka ona iha Hotel Audian no sira ne’ebé semo ho aviaun to’o iha Aeroportu Internasional Nicolau Lobato, Dili, iha loron Domingu (22/03/2020) hamutuk 94, autoridade sira lori kedas ba Hotel Novo Horizonte.

Observasaun Timor Post iha terrenu haktuir, bainhira lori pasajeiru sira ne’e to’o iha Hotel Novo Hotizonte, komunidade sira iha área ne’eba halo protesta tanba tauk iha ema balun ne’ebé kona-ona virus corona bele da’et ba sira. Maibé autoridade sira halo esplikasaun no konsege uza ona fatin ne’e ba karantina.

Objetivu husi karantina ema sira ne’ebé foin mai husi rai liur atu prevene virus ne’e da’et ba ema seluk iha timor-laran. Durante loron 14 ema sira ne’e labele besik ho família sira atu labele da’et.

To’o notísia ne’e hatun Timor Post seidauk hetan konfirmasaun kona-ba kontratu entre governu ho otél sira hodi uza hanesan karantina ba halo prevensaun ba virus corona. (cao)

No More Posts Available.

No more pages to load.