Paradeiru Família Autór Kazu Lahane “Segredu”

by -35 views
Komandante Jeral Polisia Nasional Timor-Leste (PNTL) Komisariu Faustino da Costa.

DILI—Komandante Jerál Polísia Nasionál Timor-Leste (PNTL), Komisáriu Faustino da Costa, hatete paradeiru família autór PNTL ba kazu Lahane nia labele relata loloos “Segredu” tanba iha hela prosesu investigasaun.

Komisáriu Polisia Faustino, hatete kazu oknum PNTL ne’ebé komete iha Ainitas-hun, Suku Lahane Oriental ne’e autór iha fatin ne’ebé no ninia família sira ne’e iha ne’ebé públiku mós hatene.

“Ha’u hanoin kazu ai-nitas hun nia prosesu ita boot sira hatene, agora autór ne’e ninia família iha ne’ebé, autór rasik nia prosesu la’o hela,” dehan Komisáriu Polisia Faustino hafoin enkontru ho Prezidente Repúblika iha Palásiu Prezidensiál Bairru-Pité, Kinta (24/06).

Nia afirma, prosesu hotu-hotu PNTL koopera ho PSIK husi Ministériu Justisa maka kontinua prosesu kazu ida ne’e, ne’ebé autór kazu Lahane kanaliza ona tuir ninia dalan.

Enkuantu família autór oknum PNTL nia paradeiru komandu jerál labele fó sai tanba ne’e parte justisa nian, sei labele fó ninia paradeiru ba públiku.

“Ha’u hanoin ida ne’e kestaun ida ba parte justisa nian, ne’ebé ha’u seidauk bele dehan nia fila ona ou nia iha ne’ebé,” Faustino hatete.

Nia subliña, kazu ne’ebé oknum PNTL sira enfrenta ho ninia grau ikus mai ninia rezultadu ba de’it suspende ka hapara temporaria ninia servisu, ne’e komandu jerál nia kompeténsia. Maibé membru balu nia kazu to’o ba iha demisaun, ida ne’e maka Komandu Jerál PNTL hato’o fali ba Governu maka hodi foti desizaun.(f10)