Parabéns Jornalista Timor-Leste, Timor Post Selebra ho Lansa TV Online

husi -394 views
Primeiru Ministru, Taur Matan Ruak koalia ba jornalista

(Reportájen Jaime Pires/Editor Suzana Cardoso)

Atu respeitu liberdade imprensa no fó hanoin ba Estadu konaba servisu jornalizmu nian para respeitu no kumpri direitu liberdade expresaun maka Nasoens Unidas (ONU) desidi loron 3 Maiu tinan-tinan nuudar loron mundial liberdade imprensa nian.

“Lori ha’u-nia naran rasik no Governu nia naran hakarak hatao’o votus felisitasaun ba jornalista sira iha mundu tomak. No espesialmente ba jornalista Timoroan sira hotu ba imi-nia loron espesial ohin.”

Votus felisitasaun ne’e Primeiru Ministru Taur Matan Ruak hato’o liu husi nia komunikadu imptensa ne’ebé Timor Post asesu, Segunda (3/5/2021).

PM Taur esplika, loron 3 Fulan Maiu, nu’udar loron espesial ida ba ita-boot sira (Jornalista-Red), loron ne’ebé Nasoins Unidas adopta hanesan Loron Mundial Liberdade Imprensa hodi fó hanoin ba País hotu iha mundu tomak atu respeita Liberdade Imprensa.

Katak PM Taur, governu respeita tebes Liberdade Imprensa, no iha vontade atu kontinua apoiu Insitiuisaun Média sira hodi kontinua hala’o sira-nia kna’ar ho independente, imparsialidade, respeitu kode etika jornalista no responsabilidade nu’udar pilar importante ba ita-nia demokrasia.

“Ita-nia País daudaun ne’e hasoru hela obstaklu boot rua, ida mak dezastre naturais ne’ebe akontese iha loron 4 Fulan Abril Tinan 2021. No ida seluk mak Pandemia COVID-19. Governu halo esforsu hotu-hotu oinsa atu minimza impaktu hosi kalamidade rua ne’e,” hateten PM Taur hodi hatutan.

Iha situasaun sira hanesan ne’e, jornalista sira-nia kontribuisaun oinsa tulun ita-nia Estadu iha divulgasaun informasaun ne’ebe loos, justu, kredivel no mais edukativu hodi bele ajuda ita-nia Estadu iha situasaun ida ne’e.

Iha komunikadu imprensa ne’e PM Taur mós fó agradese tebes ba jornalista sira nia kontirbisaun durante ne’e. Liu hosi orgaun komunikasaun sosial sira hato’o ona informasaun ba publiku, relativa ho atividade sira Governu nian.

“Maske imi hasoru difikuldades oioin iha terenu. Maibe imi nafatin iha vontade, ba ida ne’e. Ha’u-nia hakuak boot ba imi hotu no dala ida tan parabéns,” katak PM Taur hodi hakotu komunikadu imprensa ne’e.

Reporter sira ne’ebe la iha Ketan 

Felisitasaun hanesan mós mai hosi Ministru Parlamentar no Komunikasaun Sosiál (Mapkoms), Francisco Martins da Costa Pereira Jerónimo ne’ebé Timor Post asesu iha loron Sesta, 30 Abril 2021.

Mapkoms kongratula professional komunikasaun sosiál hodi hateten, Governu Konstitusionál da VIII kontinua komprometidu atu promove bebeik dezenvolvimentu setór Komunikasaun Sosiál nian no dezenvolvimentu ba ninia padraun profisionál sira.

Katak Mapkoms Jeronimo, Índise Mundiál kona-ba Liberdade Imprensa tinan ida ne’e nian, ne’ebé habelar ona hosi asosiasaun Reporter sira ne’ebé la iha Ketan (Sem Fronteiras), hatuur Timor-Leste hanesan nasaun ida ne’ebé hetan klasifikasaun di’ak liu iha Sudeste Aziátiku nian relasiona ho “nivel liberdade nian ne’ebé fó ba jornalista sira”.

No hatuur Timor-Leste iha pozisaun 71 tuir Mapkoms Jeronimo, sa’e tan pontu hitu kompara ho tinan 2020 nian. Nune’e Timor-Leste mos klasifikadu iha Nasaun sira ne’ebé iha sensibilidade ba profisaun journalizmu nian entre país 180 ne’ebé hetan ona avaliasaun husi asosiasaun ne’e iha mundu tomak.

Lansa Timor Post TV Online

Nuudar Media ne’ebé moris uluk hafoin Timor-Leste restaura nia independensia, Jornál Timor Post selebra loron liberdade imprensa tinan 2021 ho aumenta produtu foun ho lansa Timor Post TV Online.

Jornál Timor Post ne’ebé harii iha loron 29 Fevereiru 2000 durante ne’e iha ona website www.timorpost.com. Ho prezensa Televizaun online nian, hein katak bele reforsa liutan publikasaun informasaun ba Timor-Leste. (Lee notisia seluk iha jornál Timor Post)