Padre José Siquera: Tulun Malu hodi Hetan Maromak Nia Bensaun

by -265 views
Ilustrasaun

Dili (Timor Post)—Padre José Siquera iha nia omília selebrasaun misa Domingu (19/09/2021) iha Estasaun Nossa Señora de Graca, Lesibutak-Manleuana, Dili, subliña Maromak nia bensaun ba ema hotu iha mundu liuhusi dalan tulun malu.

Ba sarani sira, Padre José hatete, tulun malu nu’udar xave liuliu iha tempu susar nia laran hahú kedas husi família uma laran, iha viziñu no sosiedade ho onestidade maka Maromak la taka matan haraik bensaun no grasa.

Padre José dehan, iha família ida nu’udar sarani, inan-aman ho oan sira tenke tulun malu. Ho nune’e maka sai ona toman ida ba ema seluk oinsá loke matan no tilun atu hotu-hotu iha konsiénsia ba moris tuir Maromak nia hakarak.

“Oan onestu ba inan-aman no tulun malu hodi hetan Maromak nia bensau no grasa wain. Domingu ohin tempu komun no tempu ordináriu,” Padre José hatutan.

Maromak konvida sarani hotu moris no pasiensia no perdua iha tempu ne’ebé de’it maski moris hasoru situasaun difisil. Maibé nafatin fiar iha Maromak hodi bele hetan salvasaun moris iha mundu.

Iha selebrasaun misa Domingu ne’e, evanjellu haktuir Saun João haktuir bainhira Jesus konvida sarani hotu atu aprende husi labarik kiik sira normalmente labarik sira tenke aprende husi inan-aman sira nian no ema ne’ebé ho idade boot. Tanba ne’e maka Jesus haree labarik oan sira moris ho obidensia katak ema hotu bele sai privadu onestu simples no obedese atu hala’o Maromak nia hakarak iha moris tomak.

Evanjellu fo hanoin moris ho onestidade ba malu liu husi buat ne’ebé hetan maibé ne’e grasa Maromak nian n’udar ema tenke agradese ba Maromak ba di’ak tomak.

Iha primeira leitura livru Sabedoria hatudu ba sarani tomak katak ema laran a’at ne’ebé hakarak hasusar ema laran di’ak sira hodi koko ema laran di’ak sira nia laran no pasiensia.

Hasai liafuan a’at, dun sala tanba ema a’at sira ninia hahalok maski sira hein katak ema di’ak maka Maromak nia oan ne’ebé lakohi atu ko’alia a’at no lakohi dun matak ema no halo tuir Maromak ninia hakarak.

Iha segunda leitura Saun Tiago dehan matenek na’in sei tun husi lalehan nia sei mai ho laran mos no mai ho dame laran mamar ho lian ida de’it ba ema tomak la ho laran makerek.Tanba ne’e maka Sao Tiago fo hanoin mai ita katak atu ita labele moris ho laran moras no labele hanoin at ba malu no labele laran moras ba malu la manan buat ida.

Tanba ne’e maka Jesus husu ita sarani sira moris ho karakteristika simples ba maluk sira ne’ebé moris iha felisidade no kontente ho alegria hodi hanoin di’ak no moris ho onestu tuir Maromak nia hakarak iha família no sosiedade sai espellu di’ak ba ema hotu.

Padre dehan labarik sira maka sai mestre moris iha família hodi sai obedensia. Ita husu Maromak nia ispiritu santu atu hasai at tensaun at no haraik ba sira grasa isin domin no vida naruk no hodi banati tuir Maromak doutrina. (asb)

No More Posts Available.

No more pages to load.