Osan Laiha, Governu Hapara Kontratu ho kompañia Gardamor, Funsionáriu Sira Preokupa no Balun Tanis

by -40 views

Timor Post (17/03/2021)—Governu liuhusi Ministériu Negósiu Estranjeiru no Kooperasaun (MNEK) hapara tiha ona kontratu ho kompañia Gardamor no koloka fali seguransa sivíl hodi fó seguransa iha edefísiu ministériu nian tanba rajaun osan laiha.

Desizaun ne’e afeta tebes ba pesoal seguransa Gardamor na’in-31.

Ohin dader, seguransa Gardamor sira la fo fatin ba seguransa sivil sira atu ba fó seguransa iha edefísiu MNEK no ezije sira nia direitu.

Komandante Polísia Munisípiu Dili ho nia ekipa ba asegura kedas seguransa iha fatin ne’e hodi observa ho evita konflitu entre  pesoal sira.

Sekretáriu Jerál  MNEK, Jorge Trindade Neves Camões konvoka kedas sorumutu entre pesoal seguransa Gardamor ho autoridade kompaÑia ne’e nian. Iha reuniaun Jorge subliña, desizaun ne’e altu nivél tanba ministériu laiha kondisaun ka laiha ona verba atu mantein prestasaun servisu husi Gardamor.

Sekretáriu Jerál defende katak, desizaun ministériu nian la’ós hapara pesoal sira fó seguransa iha edefísiu MNEK, tanba ne’e kompeténsia no responsabilidade kompañia nian.

“Funsionáriu Gardamor ninian Gardamor tenke toma responsabilidade tanba ministériu negósiu estranjeiru asina kontratu ho Gardamor,” Sekretáriu Jerál subliña kestaun ne’e relasiona ho preokupasaun autoridade Gardamor nian kona-ba ministériu nia desizaun ne’e fó impaktu tebes ba pesoal seguransa sira tanba lakon servisu iha situasaun difisil nia laran.

Sekretáriu Jerál hatutan, ho desizaun governu nian ne’e maka afeta ba pesoal seguransa sira husu indeminizasaun ne’e la’ós ministériu nia responsabilidade.

Iha diskusaun ohin iha sala edefísiu MNEK, Diretór Jerál Gardamor, Eduardo Belo alias GATOT preokupa tebes ho desizaun ministériu nian ne’e tanba nia rekoñese kompañia mak toma responsavilidade ba indiminizasaun ba pesoal seguransa sira, maibé ho desizaun ministériu nian iha situasaun difil nia laran provoka kedas problema dezempregu ne’ebé tuir nia responsabilidade governu nian mós.

“Problema kampo de traballu ne’e problema nasionál,” GATOT afirma.

Entretantu pesoal funsionáriu Gardamor ne’ebé servisu kuaze tinan barak ona sente ameasa tebes ho desizaun governu nian ne’e iha los situasaun difisil moras COVID-19 no situasaun polítika rai laran halo kampo servisu laiha.

Funsionáriu Gardamor rona ona informasaun katak ministériu atu foti desizaun ne’e antes no nia ho inisiativa tenta ba hasoru Prezidente Repúblika no ba iha Parlaentu Nasionál hatoo sira nia preokupasaun ho mataben.

“Ami hakarak servisu nafatin atu ami nia lorloron sustenta ami nia família. Derepente hapara hanesan ne’e hanesan koa ami nia kakorok,” Porta-Voz Seguransa Gardamor, Januário Ricardo nu’udar funsionáriu Gardamor ne’ebé durante ne’e ho nia kolega sira fó seguransa iha edefísiu MNEK ko’alia ho laran triste no haktuir nia sempre tanis tanba hanoin lakon servisu fó impaktu tebes ba nesesidade família nian.

Jornalista Maria Lízia

Editór Noémio Falcão