Osan ba Programa Sesta Bázika La Ajusta iha OJE 2021, Ministru Joaquim fó Resposta ba Preokupasaun CNRT

husi -12 views

Timor Post (15/02/2021)- Ministru Koordenadór Asuntu Ekonómiku, Joaquim Amaral, hatete osan 7% simu hosi kada ministériu hodi taka ba programa sesta bázika.

“Ida ne’e hodi taka no kobre pagamentu ba iha sesta bázika nian”, dehan Ministru iha Palasiu Governu, segunda (15/02).

Amaral hatutan ajustamentu ne’e halo hotu ona, semana oin pagamentu bele iha efetivu ona.

Relasiona ho preokupasaun bankada parlamentár CNRT katak orsamentu jerál 2021 bazeia ba programa, maibé programa sesta bázika la Governu mensiona  Amaral hatán programa ne’e labele ajusta ho OJE 2021 tanba tarde.

“Programa ne’ebé tarde uitoan, labele halo ajustamentu iha OJE 2021 entaun halo ajustamentu interna hodi kobre programa ida ne’e bele la’o ba oin”, esplika Ministru.

Governante adianta katak simu 7% hosi kada ministériu mós la afeta ba programa kada ministériu nian.

To’o agora gastu ona total orsamentu hira ba programa refere Ministru lahatene tanba  pagamentu sentraliza  ne’ebé ministériu finansas mak bele esplika.

Tuir planu atu finaliza programa distribuisaun sesta bázika iha fulan Fevereiru maibé Ministru dehan  hare ba situasaun no posibilidade sei  estende tan ba tempu tuir mai.

Sesta bázika programa ambisiozu VIII Governu nian hodi rekupera ekonomia hafoin hasai direitu sidadaun sira nian liuhosi estadu emerjénsia tanba covid-19.

Hahú hosi Marsu 2020 to’o 14 Fevereiru 2021  númeru kumulativu hosi fó sai hosi pájina Ministériu Saúde TL kazu konfirmandu 102 rejistu kazu konfirmandu foun 1, númeru kumulativu teste 20120, kumulativu rezultadu negativu 19870, hein rezultadu 184, númeru kazu baixa hela 40, númeru rekupera 66, mate 0.

Jornalista            : Jaime Pires

Editor                    : Mariano Martins