ADVERTISEMENT

Knar Parteira ba Dezenvolvimentu Umana iha Timor-Leste

Timor Post - Opiniaun
  • Share
Imajen Hakerek nain

By: Livio da Conceicao Matos, Eugenia Carvalho de Araujo, Ermelinda da Costa Monteiro, Rafael dos Santos Ximenes, Etelvina Jose Tilman

Background: Parteira, ema ne’ebe formadu atu sai nudar servidor, edukador, manajer no peskizador iha area saude inan ho oan. Dalaruma ema barak mak seidauk rekoñese profisaun ka knar nain iha area saude ida ne’e. Sira, ema ne’ebe iha ona knar molok fini ita nia inan ho fini ita nia aman hasoru malu iha ita nia inan nia isin lolon. Parteira iha knar imprtante rua ba saude inan ho oan.

ADVERTISEMENT
SCROLL FILA BA NOTISIA


Knar rua ne’e mak control and prevention. Control katak parteira sira halo tratamentu ba inan ho oan ne’ebe hetan ona problema saude. Atividade iha control effort mak hanesan fo tratamentu ba inan isin rua ne’ebe hetan anemia, fo tratamentu ba bebe ne’ebe moris mai ho todan menus, fo tratamentu ba inan isin rua ne’ebe hetan moras komplikasaun no seluk-seluk tan.

Prevention katak esforsu ne’ebe parteira sira hala’o iha sira nia knar fatin atu evita akontesimentu moras ka problema saude ba inan ho oan. Atividade iha esforsu prevensaun mak hanesan hala’o atividade Ante-Natal Care (ANC), halo promosaun saude, hala’o akonselamentu ba parseiru sira atu evita moras hadaet liu husi relasaun sexual, promosaun nutrisaun diak ba inan isin rua atu prevene malnutrisaun ba isin rua no seluk – seluk tan.

Knar Parteira ba feto ho mane molok forma uma kain ka familia: Parteira iha knar importante ida ba formasaun familia mak atu forma no eduka ema liu husi akonsellamentu no promosaun saude ne’ebe adekuadu, atu ema ididak rekoñese nia an nomos rekoñese ema seluk, molok forma familia.

Akonsellamentu babain iha oin rua:  (1) Akonsellamentu individual ne’ebe fo oportunidade ba individu ididak, feto ka mane, atu koalia husi fuan ba fuan ka heart to heart ho parteira sira konaba saude reprodutiva umana. (2) Akonsellamentu kaben-nain ne’ebe fo oportunidade ba kaben nain sira atu konsulta ba parteira sira, hodi hatene informasaun klean liu tan ba problema reprodutiva ne’ebe sira hasoru.

Promosaun saude fahe ba parte tolu tuir grupu partisipante, nebe kompostu husi (1) Promosaun saude ba grupu ki’ik ne’ebe dalawain numeru partisipante nain 10 mai kraik, (2) Promosaun saude ba grupu naton ne’ebe dalawain numeru partisipante nain 11 – 30, (3) Promosaun saude ba grupu boot ne’ebe kompostu ho numeru partisipante ne’ebe boot.

Lee Mós :
Opiniaun: FALSIFIKAUN NOTA KA DOKUMENTU NE’E KORRUPSAUN !

Edukasaun informal hirak ne’e parteira sira oferese ba komunidade tomak iha sira nia servisu ka knar fatin.

Knar Parteira ba inan isin rua sira: Parteira nia knar atu fo atendimentu ba inan isin rua sira hahu husi menstruasaun la mai, durante isin rua to’o inan sira tur ahi ka partu.

Atendimentu ne’ebe parteira sira oferese ba inan sira durante isin rua mak hanesan: hala’o ezaminasaun ba inan isin rua inklui fiziku no psikososial, halo diagnostika bazeia ba ezaminasaun, detekta fator risku iha inan isin rua sira, fo tratamentu bazeia ba diagnostiku, fo akonsellamentu bazeia ba kondisaun inan isin rua sira nian no halo transferênsia wainhira inan isin rua sira hetan sinais perigu.

Iha sorin seluk, parteira mos halo promosaun saúde ba inan isin rua sira konaba: konsulta regular minimal dala hat durante isin rua, Planeamentu Familiar, Nutrisaun, Imunizasaun Tetanus Toxoid, konsumu ai-moruk aumenta ran (Sulfatu Ferozu), Fator risku durante isin rua, moras hadaet husi relasaun sexual no halo planu partu hamutuk ho inan isin rua sira.

Knar Parteira ba bebe foin moris: Parteira nia knar atu kuidadus ba bebe sira ne’ebe foin moris mai, presiza fo atendementu imediatamente tamba wainhira bebe sira moris mai sempre iha mundansa iha sira nia vida no sira nia imunidade rasik husi intra uterina to’o extra-uterina. Parteira sira nia knar mantein nafatin kuidadus ba bebe sira nia ambiente ho seguru durante 0 – 5 minutus dahuluk.

Tamba maioria bebe sira moris mai sempre iha difikuldade ba sira nia respirasaun. Problema ne’ebe mak akontese ba bebe foin moris mak hanesan asfixia (bebe falta de oxigénio), Hipotermia (bebe nia temperatura menus husi normal) no Hipoglisemia (bebe falta glukoza).

Komunidade dala barak ladun hatene konaba bebe sira nia kondisaun bainhira moris mai. Alein ida ne’e mos, parteira sira sempre fo akonsellamentu ba inan sira konaba kuidadus rutina maka hanesan: mantein bebe nia kalor atu nune bebe labele hetan hipotermia, kuidadus ba bebe nia umbilikus (husar tali atu labele hetan infeksaun), fo susu been esklusivu husi moris to fulan nen (ajuda bebe prevene husi moras, prevene alergia, aumenta intelejent (IQ) no relasaun domin inan ho oan), lori bebe ba imunizasaun (atu prevene moras TB, Hepatitis, Poliomelitis, DPT no Sarampo, tetu kada fulan (atu kontrola bebe nia kresimentu no desevolvementu ba bebe nia an rasik).

Lee Mós :
Fihir Fenomena Atual Balun Loron Ohin Nian

Parteira sira nia knar salva jerasaun foun iha rai doben Timor Leste ajuda redusaun ba taxa mortalidade no morbilidade ba bebe sira bazeiandu ba Survey Demográfiku Saúde Timor Leste tinan 2016,Taxa Mortalidade Infantil menus husi  tinan 5, 30-41/1.000 partus moris no neonatal besik 22/1000 partus moris. Parteira nia knar servisu sempre fahe informasaun ba komunidade sira atu atensaun ba bebe foin moris.

Knar Parteira ba adolesentes sira: Parteira iha knar importante ida ba adolesente sira mak forma adolesente sira atu iha koñesimentu no attitude diak ba sira nia isin lolon durante moris mesak nudar adolesente.

Parteira iha kapasidade atu fo akonsellamentu ba feto no mane foin sae sira atu sira prepara sira nia an nudar jerasaun ne’ebe iha kualidade diak hare husi fiziku ho psikolojiku. Parteria iha kapasidade atu lidera no fasilita adolesente sira atu labele monu ba tentasaun ka ransu livre ne’ebe bele hamosu impaktu negativu ba sira nia moris.

Parteira iha kapasidade atu sai edukador no orientador ba foin-sae sira atu sai nudar fini diak ba futuru nasaun nian. Ema tomak iha direitu atu halo saida deit iha nia moris tomak. Maibe atu halo saida deit ne’e iha limitasaun.

Saida mak Limita? Direitu ema seluk atu moris iha ambiente sosiedade ne’ebe saudavel no konfortavel. Keta halo ita boot nia direitu atu halo saida deit ne’e, impede fali direitu ema seluk hodi moris saudavel no konfortavel iha sosiedade. Saida tan mak limita ema atu halo saida deit? Direitu ema ne’e rasik atu hetan moris diak no nabilan iha nia loron aban bain-rua.

Keta halo, direitu atu halo saida deit iha nia moris tomak ne’e, impede fali direitu ita boot rasik, atu bele atinji mehi diak ne’ebe sei mosu mai iha loron aban-bainrua. Ema iha direitu tomak atu halo sexual livre (free sexual) maibe keta halo ita boot nia direitu ne’e sai impedementu boot ida, ba ita boot rasik atu atinji moris diak iha loron aban bainrua.

Lee Mós :
Papél Partidu Polítiku Iha Elpar

Ikan iha tasi laran iha direitu tomak atu nani husi tasi Lospalos, la’o haleu mundu no fila fali mai Lospalos nia tasi. Maibe saida mak akontese ba nia, karik nia haksoit sai husi tasi? Kuida ita boot nia direitu, tanba ida ne’e sai fator determinante ba ita boot nia loron aban-bainrua. Parteira formadu atu sai nudar lalenok ba adolesente sira no iha tempu hanesan sira mos bele sai fasilitador ba adolesente sira hodi resolve sira problema rasik.

Knar Parteira iha vida sosiedade: Parteira durante sira nia formasaun, sira hetan preparasaun atu bele identifika problema hirak ne’ebe mosu iha komunidade nia laran no sira mos formadu atu bele identifika kauza husi problema hirak ne’ebe mosu iha komunidade.

Sira prepara atu sai peskizador hodi bele identifika kazu (problema) no nia kauza, hodi nune’e intervensaun ne’ebe adekuadu bele atualiza hodi bele hatun numeru kazu iha komunidade iha periodu ne’ebe determina. Parteira formadu atu sai nudar fontes informasaun ba dezenvolvimentu umana iha sosiedade.

Parteira formadu atu foka sai lakuna ka gaps hirak ne’ebe sai nudar bareira ba dezenvolvimentu umana. Parteira tenke formadu atu foka sai katak feto klosan sira tenke kuida sira nia an, tanba husi sira nia isin lolon ne’ebe preparadu, sei moris mai jerasaun foun nasaun ida ne’e, ne’ebe ho kualidade diak ba dezenvolvimentu umana nasaun ne’e ba oin.

Parteira tenke foka sai katak inan isin rua sempre han, aihan ne’ebe iha nutrisaun diak tanba kosok oan iha knotak presiza nutrisaun husi nia inan ne’ebe kous hela nia. Parteira tenke foka sai iha sosiedade katak inan isin rua labele hetan violensia durante isin rua tanba sei iha impaktu ba nia an ho ba kosok oan ne’ebe iha nia knotak.

Hodi nune’e parteira laos deit atende wainhira problema mosu ona maibe parteira sai nudar pontu fokal atu prevene fator hirak ne’ebe bele sai kauza ba akontesimentu moras ka problema saude seluk-seluk iha area saude inan ho oan.

 7,709 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Knar Parteira ba Dezenvolvimentu Umana iha Timo…” A few seconds ago

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No