Opiniaun: TANBA-SÁ ESKOLA PRIVADA SIRA IHA TIMOR-LESTE NIA KUALIDADE DI’AKLIU ESKOLA PÚBLIKA?

by -338 views

Hakerek Nain: Domingos de Deus Maia

Ita foin rona anúnsiu-formál husi S. E. Ministra EJD, iha Sexta feira, loron 6 fulan dezembru 2019, kona-bá Rezultadu Ezame Nasionál tinan ne’e nian liuhusi média oin-oin. Nia rezultadu finál maka: Husi estudante partisipante sira na’in 51.676 (rihun limanulu resin ida, atus nen hitunulu resin nen), na’in 1.023 (rihun ida ruanulu resin tolu) mak laliu (não passaram) Ezame Nasionál. Ita hotu ho ksolok simu rezuladu di’ak ida ne’e.

Maibé, wainhira ita haree fali ba lista husi estudante sira ne’e, sira ne’ebé mak hetan prestasaun aas-liu (os melhores), mai husi Eskola Privada Katólika sira no Cafe, iha Timor-laran tomak. Ita senti orgullu, liu-liu, ba Eskola Cafe sira, ne’ebé foin mak liuhusi kahakat (passo) ida, maibé hatudu daudaun ona sira-nia prestasaun-nabilan.

Maibé, sei mosu nafatin hahusuk (pergunta) boot ne’ebé mak inan-aman, sosiedade no akadémiku sira, baibain, hato’o maka: Tanbasá mak Eskola Privada sira, iha Timor-Leste, ninia Kualidade Di’akliu fali Eskola Públika sira, durante ne’e?

Ho “honestidade”, la haksunik ita-nia realiade ida ne’e ba mundu. Loos duni, se ita halo koresaun loloos no ema la tau-liman ba “Aparelho Correção” Ezame Nasionál nian no fo “nota-katrolan”, garantidu, katak sei hetan duni rezultadu-real husi notas, ka “valor prestação baixa” tuir “Estandarização Normal Internacional” nian. Se hakarak atu hatudu loloos porfil husi edukasaun, iha Timor-Leste no la bosok-an, mai ita simu realidade ida ne’e ho fuan-boot hodi hari’i metin liután fatuk-inan kahakat ida ne’ebé loos ba kualidade edukasaun Timor-Leste nian.    Wainhira sei la’o nafatin ho mentalidade-manobra (“katrol”) valór-reál sira hodi defende de’it manorin sira, eskola no edukasaun nia naran-di’ak, maka ita buka taka-dalan metin ba hari’i kualidade orijinál (não manobrada) tunas-foun, iha Sistema Edukasaun Nasionál nian.

Atu fó-resposta ruma ba pergunta iha leten, maske la ho báze peskiza sientífika formál ida, maibé, tan de’it senti iha mos responsabilidade-morál atu fahe (partilha) ezperiénsia uitoan kona-bá kualidade edukasaun, iha rai-laran, nu’udar manorin-tuan ida no eiz-DG, durante període-naruk ida, iha Ministério Educação. Iha fatór no indikadór balun mak hatudu tanbasá Eskola Privada sira, iha Timor-Leste, nia kualidade sei aas liu Eskola Públika sira:

  1. Estrutura no Lideransa-Pastorál:

Kona-bá Estrutura Organizasun no Lideransa-Pastorál, inklui mos jestaun no administrasaun, iha Fundasaun, Instituisaun no Eskola Privada sira, fatór rua ne’e nia abut (fonte hierárquica) ida de’it mak Igreja-Lokál, ne’ebé la fasil atu hetan influénsia-boot husi liur (external) ba nia mudansa. Ezemplu:  See mak sai diretór no prezidente iha Fundasaun no Instituisaun Edukasaun nian maka: Padre, madre ka relijiozu sira; se iha leigu ruma, soi de’it pozisaun nu’udar ezekutivu (ka ema da-2, ka da-3); nune’e mos ba nia jestaun no administrasaun hala’o ho sistema kontrolu ida ne’ebé mak metin nanis ona husi leten.

  1. Visão no Missão.

Kreda nia vizaun no misaun klaru ona, la dok husi: Hari’i Fundasaun no Instituisaun eskola ruma nu’udar meiu (sarana pastoral) ida atu iha interasaun-sientífika husi responsável, manorin no estudante sira, tuir idak-idak nia knaar no fatin, iha eskola, hodi fahe ba malu ezperiénsia (partilhar/menggumuli) sientífika hodi hari’i-an, konese mundu no Maromak. Nia báze teolójika maka Maromak hakarak atu soi ema totomak (inteiro), isin no klamar.

Ne’eduni, nia misaun mak tenke hari’i (eleva) ema-nia moris liuhusi aspetu hotu-hotu (seguindo as áreas disciplinares, incluindo a Relijiaun). Katak nia misaun hatuur no haktuir de’it tuir asaun-misionária Kreda nian. Tanba ema hotu ne’ebé mak simu ona Sakramentu Batismu, sei haknaar-an iha Kristu nia Knaar-Ulun Na’i Lulik (Sacerdócio Real) nian tolu ne’e: Profétika (atu haklaken), Liurai (atu ukun) no Mestre (atu hanorin). Sira ne’ebé mak hatuur-an nu’udar manorin, iha edukasaun, idak-idak (padre, relijiozu no leigu) tenke iha konsiente ba nia knaar-kmok ida ne’e nu’udar babolun (chamamento de Cristo); la’os de’it tan saláriu (osan) no serve Edukasaun hanesan fali “Campo de Trabalho para ganhar o pão de cada dia”.

  1. Sistema Lideransa-Pastorál. Oinsá?

Husi Estado no Nação, dala wa’in ona, na’i-ulun bolu (apela a atenção) ba formasaun

“Espírito Nacionalismo no Patriotismo” husi sidadaun tunas-foun futuru Nasaun nian. Manorin sira nu’udar sidadaun, ne’ebé “ativo e dedicado”, hala’o sira-nia knaar kanorin, loroloron, bele hari’i no hatudu ona sira-nia “espírito nacionalismo e patriotismo”.

Husi parte Kreda nian hateten: Hari’i espíritualidade-pastorál nian, katak atu ema sarani idak-idak, iha hala’o nia knaar-norin, loroloron, hatudu mos nia espíritu Bibi-atan Dia’k nian, nu’udar sa’eseluk Kristu nian, iha kampu Edukasaun. Oinsá? Mai ita konese karaterístika espesiál balun husi espiritualidade-pastorál nian, tuir pasajen bíblika, bele lee: Jo 10: 11-15.

“Eu sou o bom pastor: O bom pastor dá a vida pelas suas ovelhas.

O mercenário, que não é pastor e a quem as ovelhas não pertencem, quando vê chegar o lobo abandona as ovelhas e foge. Então o lobo ataca e dispersa as ovelhas.

O mercenário foge porque trabalha só por dinheiro e não se importa com as ovelhas.

Eu sou o bom pastor: conheço as minhas ovelhas e elas conhecem-Me, assim como o Pai Me conhece e Eu conheço o Pai.

Eu dou a vida pelas ovelhas”.

Tanesan manorin-sarani nu’udar sa’eseluk Bibi-atan Di’ak (Jesus Cristo); bibi mak estudante sira, iha eskola; eskola mak fatin Kreda-ki’ik (Reino dos céus) nian ida.

  • Bibi-atan nu’udar manorin ida tenki fó nia moris-tomak ba nia bibi (estudante) sira, iha eskola; realidade hatudu duni nune’e, ka lae?
  • la soe, la abandona, husik hela nia bibi (estudante) sira, iha situasaun norin,

tantu iha eskola no iha liur; bele sukat manorin sira nia prezensa ativa, iha esola sira, liuhusi lista-prezensa, frekuénsia lisensa ba lia moris-lia mate; hala’o atividade “fora do dever” no la justifika loloos nia obrigasaun morál, iha Maromak nia oin.

  • la halai husi nia responsabilidade tau-matan; brani atu hasoru situasaun sira difisil; to’o tempu fahe rezultadu ezame, hasees-an tiha ho razaun oin-oin; tuir loloos tanba tauk atu responsabiliza rezulradu ne’ebé mihis husi nia estudante, iha inan-aman sira nia oin.
  • la serbisu tanba osan de’it; maibé tanba hadomi no hakarak atu serbí duni nia estudante sira ho neon-laran no sakrifísiu-boot; la’os buka ida diák no kman de’it.
  • konese nia estudante sira, idak-idak; bolu sira naran idak-idak; hatene tuir nia lala’ok sira; manorin tenke konese, hakbesik liu ba nia estudante sira no kompriende sira liuhusi naran; la hatene mak la hadomi; nst.
  • halo nia estudante sira konese nia, hamaluk, keta hadok-an husi sira; manorin sira, iha tempu livre, halibur-malu halo konversa ketak tiha; se bele halo vizita ba uma hodi konese mos ambiente uma-laran nian; ka husu estudante vizita ba manorin nia uman.

Karater sira espiritualidade-pastorál nian ne’e mak ideál marka diferensa espíritu dedikasaun manorin sira, iha Eskola Privada sira, atu hari’i kualidade, uluk nana’in, ba kualidade ema nian (humana) hodi hetan influénsia ba kualidade sientífika. Ne’e duni, formasaun kona-bá karater espiritualidade hirak ne’e nian tenke hala’o liuhusi Retiro Anuál husi Igreja ba manorin-sarani sira; tan ho de’it misa no orasaun-devosionál loronloron, la soi fó-ha bosun (nutrifica) manorin sira nia espíritu-norin.

Se karater espiritualidade-pastorál (bibi-atan) nian hirak ne’e mak kuda tiha ona iha manorin-sarani sira hotu nu’udar sa’eseluk Kristu nian no aplika duni daudaun iha sira-nia moris tomak, bele fihir katak iha ona garantia rekompensasaun-espirituál ida katak, manorin  sira, iha edukasaun, bele hulan ona nia kruz (hanorin) loroloron hodi la’o tuir Kristu-nia ain-fatin ba. Se bibi-atan ida fraku tan hamlaha no hamrok hela, oinsá mak bele lori (conduz) bibi sira ba kampu du’ut-matak no we lihun-malirin (vida da escola e sociedade de qualidade)?

No More Posts Available.

No more pages to load.