Operasaun Konjunta Kaptura Tan Membru PSHT Na’in-Haat iha Fronteira

by -167 views

Jornalista Jaime Pires / Editór Noémio Falcão

DILI (Timor Post)—Polísia Nasionál Timor-Leste (PNTL) liuhusi operasaun konjunta komportu husi Unidade Espesial Batallaun Ordem Públika (BOP) no  Kompañia  Operasaun Espesial (COE) no Unidade Patrullamentu Fronteira (UPF) kaptura tan membru Grupu Arte Marsiál (GAM) na’in-haat (4) iha área mota Malibaka ne’ebé hakat ilegal fronteira terrestre Timor-Leste no Indonézia.

Kapturasaun ba joven mane hirak ne’e, iha loron kuarta dader iha Aldeia Huluati, Suku Memo, Postu Administrativu Maliana ne’ebé lidera husi Komandante BOP Kompañia Delta, Inspetor Rosalino do Santos no Komandante pelotaun COE, Inpetor asistente polísia Júlio Bosco.

“Atu informa de’it foin daudaun ita nia membru COE ho mós  BOP ne’ebé horikalan kedas fo apoiu ba UPF iha liña fronteira Suku Tapo/Memo, iha dader ne’e konsege kaptura tan joven mane na’in-4 hamutuk ho evidénsia komprovativu sira hanesan farda treinu PSHT iha área fronteira ne’ebé ho intensaun ba sa’e sabuk iha Indonezia”, esplika Komandante UEP, Superintendente Xefe Polísia Orlando Gomes, ba jornalista sira via telefone, kuarta dader ne’e.

Orlando haktuir, joven na’in 4 ne’e, iha na’in tolu ho inisial (EF), (LFL) no (OC), husi Aldeia Atus Suku GIldapil, tama iha 22 jullu 2021 no sae sabuk iha 16 agostu 2021. Enkuantu na’in ida seluk ho inisial MA husi Aldeia Coshal, Suku Saburai no sira na’in hat ne’e husi Munisípiu Bobonaru.

Hafoin ekipa operasaun Konjutu entre (BOP) no (COE) kaptura lori kedas ba entrega Komandu Polísia Nasionál Timor-Leste (PNTL), Munisípiu Dili hodi halo prosesu investigasaun hafoin ida ne’e kontinua entrega ba ekipa saúde Covid-19 nia hodi halo karantina durante loron 14 antes kontinua prosesu.

No More Posts Available.

No more pages to load.