Operasaun BOP-COE Kaptura Joven 11 Tenta Hakat Ilegal Fronteira

by -1.544 views
Joven sira hakat ilegal

(Reportájen  Jaime Pires /Ediror Suzana Cardoso)

DILI (Timor Post) – Tenta hakat ilegal fronteira terestre hodi ba Indonézia, sidadaun timoroan na’in 11 hetan kaptura husi Polísia Nasionál Timor-Leste (PNTL) liu husi Unidade Batallaun Ordem Públika (BOP) no Kompañia Operasional Polísia (COE).

“Ohin tuku tolu madrugada, ita nia membru UEP ne’ebe lidera hosi Komandante BOP, Inspetor Rosalino do Santos no komandante ekipa COE Inpetor asistente Julio Bosco halo operasaun konjunta hodi kaptura tan joven nain 11.”

Lia fuan hirak ne’e esplika husi Komandante Unidade Espesial Polísia (UEP), Superintendente Xefi Polísia Orlando Gomes via telfone Sabádu, (06/08) ne’e.

Nia hateten, sidadaun hirak ne’e PNTL kaptura liuhusi operasaun konjunta iha fronteira terrestre Timor-Leste ho Indonézia.

Katak Superintendente Xefi Polísia Orlando, joven sira ne’e kaptura iha Suku Saburai, Postu Administrativu Maliana, Munisípiu Bobonaru. Entre timoroan ne’e iha sidadaun Indonézia ida ho naran inisial AM no membru UPF nian ida ne’ebe mai hasoru sira hodi fasilita tama ilegalmente ba Indonezia hodi sae sabuk.

Nia dehan, sidadaun timoroan sira nia viajen ba Indonezia ne’e ilegal tanba Guvernu dekreta hela Estadu Emerjensia, bandu no taka ona fronteira terestre.

“Maske dadaun ne’e Munisipiu Bobonaru sai ona hosi Serka Sanitaria, Guvernu nafatin aplika Estadu Emerjensia hodi halo prevensaun ba Surtu Covid-19. Maibe joven sira kontinua hakat fronteira ho ilegalmente hodi ba sa’e sabuk iha Indonezia” katak Superintendente Xefi Polísia Orlando.

Nia hateten, kona-ba asuntu fronteira UEP sei reforsa efetivus balu hodi apoiu UPF no FALINTIL-Forsa Defeza Timor-Leste (F-FDTL) daudaun ne’e hetan aperta liutan, liu-liu fronteira terestre.

Katak Superintendente Xefi Polísia Orlando, PNTL sei foti medida ba membru Grupu Arte Marsiais sira ne’e hodi prosesa tuir lei ne’ebé vigor iha Timor-Leste.

“Membru arte marsiais ne’ebé hetan kapturasaun ne’e sei halo identifikasaun, hodi kontinua entrega ba ekipa saúde COVID-19 hodi kumpri kuarentena. Remata kuarentena maka foin hetan investigasaun hosi Koordenasaun Ofisiál Ligasaun Forsa Tarefa (sigla portuges; COLFT). No ikus liu entrega ba Ministeriu Publik hodi prosesa tuir lei”, subliña Superintendente Xefi Polísia Orlando.(Lee notísia seluk iha Jorál Timor Post)

 

No More Posts Available.

No more pages to load.