OMS apoiu Osan Rihun US$150 Garante Viajen Umanitária ba Timor Leste

by -797 views

Timor Post (12/03/2021)— Uniaun Europeia (UE), liuhosi  Oranizasaun Mundiál (OMS), nian iha Timor-Leste, disponibiliza ona dólar amerikanu rihun US$150 ba Programa Ai-han Mundiál (PAM), atu bele kontinua hala’o voo umanitária ba pasajeiru no kargu sira entre Dili no Kuala Lumpur Malázia.

Liuhusi komunikadu ba imprensa ne’ebé Timor Post asesu haktuir, durante Timor-Leste taka nia fronteira bainhira pandemia COVID-19 ne’ebé hada’et iha mundu tomak, inklui impozisaun ba proibisaun ba fronteira aéreu (s) iha Marsu 2020, voo komersiál  hotu-hotu  suspendidu hodi proteje nasaun  hosi  COVID-19. Durante nee, PAM nia servisu aviasaun sai hanesan voo importante ida ba fornesimentu ekipamentu médiku esensial sira hodi hatan ba COVID-19, no fornese transporte aéreu krítiku, inklui mós peritu sira ne’ebé serbisu atu apoiu esforsu Governu Timor-Leste nian hodi satan virus ne’e.

“Ha’u haksolok tebes tanba OMS deside ona atu uza fundu balun husi Ekipa Europeia hodi apoia servisu aviasaun PAM nian. Nune’e, sei garante katak, viajen umanitária ne’ebé liga Dili ba Kuala Lumpur, bele kontinua nafatin, hodi lori tulun médiku no transporte pasajeiru sira. Ligasaun aérea ne’ e importante tebes iha momentu ida ne’e, tanba kazu COVID-19 iha Timor-Leste aumenta”, tenik Embaixadór UE ba Timor-Leste, Andrew Jacobs.

Dezde fulan Juñu 2020, aviaun PAM nian  hala’o ona operasaun hamutuk 19, tula pasajeiru hamutuk 1,354  no  ekipamentu médiku no sasan esensiál sira seluk ho todan toneladas 14,5 mai Timor-Leste. Organizasaun kuaze hamutuk 83, inklui Governu Timor-Leste no korpu diplomátiku nasaun nian, hetan ona benefísiu hosi servisu aviasaun ida nee.

Apoiu fundu hamutuk USD 150,000 ne’ebé fó ba PAM hodi mantein servisu aviasaun refere, foti hosi fundu USD 2.4 millaun ne’ebé fornese ba OMS iha Timor-Leste hosi UE atu apoiu resposde ba COVID-19 no haforsa sistema saúde iha nasaun nee.

“Servisu aviasaun PAM nian sai importante tebes iha nasaun ne ‘e, nia atuasaun jerál ba COVID-19 dezde inisiu. Hanesan mós ho sira seluk, OMS hetan ona benefísiu husi servisu aviasaun refere;  fó dalan ba ita atu lori sasán médiku no ema sira ne ‘ebé importante tebes ba atuasaun COVID-19 nian. Ami kontente katak, ho apoiu husi UE, ami bele hanaruk tan apoiu finanseiru hodi suporta PAM,” hatete Reprezentante Organizasaun Mundiál Saúde nian, Dr Arvind Mathur.

Fundu UE-OMS ne’e ajuda PAM atu asegura kontinuidade no posibilidade servisu aviasaun entre Dili-Kuala Lumpur too fulan Agostu 2021. “Obrigada ba kontribuisaun ne ‘e, PAM bele kontinua halo servisu aéreu ida ne’e hodi apoia povu Timor-Leste”, hatete Dageng Liu, Reprezentante WFP iha Timor-Leste. (*/cao)

No More Posts Available.

No more pages to load.