OJP-CNRT Kondena Propaganda sira Atu Organiza Asaun Hasoru Taur ho Lú Olo

by -539 views

DILI—Organizasaun Juventude Partidu (OJP) CNRT Nasional kondena maka’as propaganda sira hafoin Orsamentu Jerál Estadu (OJE) 2020 sumba iha Parlamentu Nasionál (PN), Sesta (17/01/2020).

Sekertáriu Ezekutivu OJP-CNRT Nasional, Arlindo Pinto ba Timor Post iha loron Sábadu (18/01/2020), afirma, nia parte nota propaganda sira ne’ebé la’o, liuliu iha rede sosiál Facebook via identidade falsu (ID Falsu), hanaran “Amp Mudansa Progresso” katak, OJE-CNRT prepara asaun hasoru Primeiru Ministru Taur Matan Ruak ho Prezidente Repúblika Francisco Guterres Lú Olo (tanba to’o agora seidauk pose membru governu na’in 9 maioria husi ema CNRT), ne’e nu’udar  propaganda falsu ne’ebé atu estraga situasaun polítika nasaun nian no líder nasional sira.

Arlindo konsidera ema ne’ebé hamosu ID “Amp Mudansa Progresso”, ne’e nu’udar ema ne’ebé hanoin a’at ba estabilidade nasionál.

Arlindo mós dehan, intensaun husi ID ne’e mós hodi soran entre juventude OJP-CNRT ho juventude partidu sira seluk.

“Ha’u nu’udar Sekertáriu Exekutivo OJP-CNRT Nasional Reprezenta hodi lori Estrutura Juventude P-CNRT nia naran, no lori Estrutura Juventude Nivel Munisípiu, Postu Administrativu to’o Suku no Aldeia, deklara ba públiku katak, Informasaun ne’ebé hasai husi media sosial hodi soran líder nasional iha rai ida ne’e nu’udar probaganda falsu no ID Falsu sira mak hakarak estraga situasaun polítika iha rai laran no hakarak soran nai lider nasional sira iha rai ida ne’e,” subliña Arlindo.

Nia hatete, Juventude P-CNRT sei hakruuk nafatin ba orientasaun Comisaun Politika Nasional-CPN Partidu CNRT atu iha dissiplina nafatin, respeita opiniaun hotu, no hakmatek iha idak-idak nia fatin iha kualker situasaun hotu, no kaer metin unidade nasional iha paiz.

“Juventude mak riin ba nasaun ida ne’e, respeita no tane a’as nafatin líder nasional rezisténsia sira, hodi lori dezenvolvimentu iha rai ida ne’e ho di’ak,” Arlindo hatutan.

“Husu ba públiku no sidadaun sira hotu, atu lalika fiar probaganda falsu sira. Dame ba ita hotu no tane a’as unidade nasional iha rai ida ne’e,” nia dehan.

Tuir observasaun Timor Post hafoin votasaun ba proposta OJE 2020 sumba iha Parlamentu Nasionál, mosu reasaun sira iha rede sosiál. Balun so’e lia no fó merese ba partidu tolu forma governu Aliansa Mudansa ba Progresu (AMP), CNRT, PLP ho KHUNTO la dura tanba hetan kastigu alias hokum karma. Seluk fali triste tanba OJE 2020 la pasa fó implikasaun maka’as ba situasaun sosial ho ekonomia iha Timor Leste.

Entretantu Parlamentu Nasionál halo ona votasaun ba proposta lei Orsamentu Jerál Estadu (OJE) ba tinan fiskal 2020 ne’ebé aprejenta husi Primeiru Ministru Taur Matan Ruak ho nia membru governu sira, ho votus a favor 13, kontra 15 no abstensaun 25.

Ho nune’e, proposta ne’e la pasa, signifika proposta ne’e la hakat ona ba espesialidade. No tuir konstituisaun, governu sei iha oportunidade ba dala ida tan hodi aprejenta hikas proposta foun ba OJE 2020 nian. Maibé bainhira la aprova tan maka konstituisaun fó kompeténsia ba Prezidente Repúblika dissolve Parlamentu Nasional ho hakat ba eleisaun antesipada.

Tuir observasaun jornalista, deputadu maioria husi bankada CNRT maka vota abstensaun, FRETILIN kontra hotu, PD balu vota abstensaun no a favor.

Iha intervensaun ikus husi Primeiru Ministru Taur Matan Ruak afirma, nia simu desizaun parlamentu nasional nian no nia governu kontinua prontu atu la’o nafatin ho duodésimu, maske nia triste ho desizaun ne’e tanba iha implikasaun ba situasaun ekonomia no sosial iha Timor Leste.

“Situasaun iha parlamentu nasional hatudu dala ida tan katak, jestaun ita nia nasaun nian iha difikuldade atu lori hodi tuir dalan ne’ebé loos. Siuasaun ida ne’e loke dala ida tan ba ita nia pais atu tuir dalan orsamentu duodésimu,” Taur subliña.

Deputada husi bankada KHUNTO Olinda Guterres iha nia intervensaun afirma, nia arepende ho desizaun CNRT nian hodi la halo liu proposta OJE ne’e. Nia dehan, ba oin nia partidu dúvida boot atu hamutuk iha koligasaun ne’ebé hanesan.

Iha deklarsaun votu, Prezidente PD, Mariano Assanami Sabino hatete, nia rasik vota a favor ba OJE 2020 ho nia konsiénsia rasik hanesan deputadu no la reprejenta partidu.

Deputadu sira husi FRETILIN afirma, husi rejultadu desizaun ne’e mak hatudu desizaun polítika ne’ebé obriga jerasaun tuan sira atu tur hamutuk hodi hakotu inserteja polítika iha rai laran.

Deputadu husi PLP sente triste tanba proposta OJE ne’e la pasa, maibé sira fi’ar ba oin sei iha solusaun di’ak liu. (cao)

No More Posts Available.

No more pages to load.