OJE Retifikativu Biliaun $1 Resin Aprovadu Iha Jeneralidade

by -308 views
Imajen Midia Parlamentu Nasional

(Reportajen Jose Caet, Jaime Pires/Editor Mateus da Cruz)

DILI—Parlamentu Nasionál aprova Orsamentu Jeral Estadu retifikativu iha diskusaun jeneralidade ho montante biliaun 1,129.857.250 USD.

Prezidente Parlamentu Nasionál, Aniceto Longuinhos Guterres Lopes, deklara, primeira alterasaun ba lei númeru 1/2022 loron 3 fulan Janeiru. Orsamentu Jeral Estadu retifikativu tinan fiskal 2022 segundu alterasaun lei numeru 8/2008 loron 30 Junu lei tributaria no kriasaun fundu kombatente libertasaun nasionál.

“Rezultadu votasaun a-favor 36 kontra 24 no abstensaun 5 ho nune’e proposta lei numeru 38/V/IV aprovadu iha diskusaun faze jeneralidade,” Aniceto deklara iha plenária Parlamentu Nasionál, Segunda loro-kraik (09/5).

Ho proposta OJE retifikativu siginifika reseita konsolidada setór públiku Administrativu sa’e ba 3,234.522.481 USD, enkuantu despeza konsolidada setór públiku administrativu sa’e ba 3,233.908.681 USD.

Reseitas husi órgaun servisu administrasaun sentrál sa’e ba 2,987.140.197 USD enkuantu despeza orgaun servisus administrasaun sentrál sa’e ba 2,987.140.197 USD, ne’ebé fahe tuir kategoria klasifikasaun ekonómiku hanesan tuir mai ne’e.

Dahuluk, transférensia públika ho montante 1,837.634.189USD; daruak, bens no servisus ho montante 466,877.382 USD; datoluk, kapitál dezenvolvimentu 390,177.399 USD; dahaat, saláriu no vensimentu 250,537.130 USD; no kapitál menór 41,914.097 USD.

Proposta Orsamentu Jeral Estadu retifikativu ho montante billiaun 1,129.857.250 USD ne’e sei uza hodi finansia medida komplementár hamutuk 13:

Kriasaun fundu kombatente libertasaun nasionál ho orsamentu alokadu Biliaun 1 USD. Pagamentu 200 USD ba kada família (exeptu funsionáriu públiku sira) hamutuk millaun 70 USD.

Uma Kbiit Laek Plus, hamutuk millaun 25 USD. Bolsa Estudu ba Mellór Graduadu Estudante Ensinu Báziku no Sekundáriu, millaun 7,5 USD. Programa Mão de Obra ba Postu Administrativu, millaun 7,2 USD. Revitaliza kafé no subsídiu ba kafé Laku-teen, millaun 6,4 USD.

 

Pagamentu ba diferensa remunerasaun Polisia Nasional Timor-Leste (PNTL) nian ho rejime salariál foun, ba membru PNTL millaun 4,096 hamutuk millaun 5,1 USD.

Harii Sede Arte Marsiál no Rituál, millaun 2,5 USD. Programa Eskola iha Uma, millaun 2,1USD. Internet gratuita iha eskola sira, millaun 1,1 USD.

Alende kona-ba subsídiu akomodasaun ba Polisia Nasional Timor-Leste (PNTL) no FALINTIL Forsa Defeza Timor-Leste (F-FDTL), millaun 1,9 USD.

Estabelesimentu Sekretaria ba Asuntu Traballadór iha rai-liur no Komunidade Timoroan iha Diáspora, 500 mill USD; Empregu ba mellór alunu universitáriu sira, 437,5 mill USD.

Ikus liu, Prezidente Parlamentu Nasional husu ba deputadu sira hotu katak, diskusaun espesialidade la’o tuir giaun ohin loron 10-11 hahu diskusaun tuku 9 dadeer.

Proposta alterasaun hamutuk 18 ne’ebe hein katak bele admitidu hotu, miabe depois mak meza halo admisaun, mais proposta ne’ebe mak hatoo ba meza Parlamentu Nasional hamutuk 18.

Iha fatin hanesan, Primeiru Ministru Taur Matan Ruak, apresia no agradese partisipasaun membru durante halo diskusaun kona-ba orsamentu retifikativu iha faze jeneralidade.

“Governu rezista preokupasaun sira hotu, ne’ebe levanta durante debate no promete atu kontinua hakle’an partisipasuan iha diskusaun tuir mai iha espesialidade atu hariku tan ita nia debate sura”, Taur agradese.

Liuhosi aprovasaun orsamentu retifikativu iha plenaria Parlamentu Nasional, Primeiru Ministru kontinua hakarak agradese dala ida tan ba deputadu no deputada sira hotu ninia partisipasaun.

No More Posts Available.

No more pages to load.