OJE 2021 Passa ho Unanimidade: Orsamentu ba Agrikultura Pursentu 1.7 De’it, KHUNTO fo Parabens baFRETILIN

by -152 views

Timor Post (12/12/2020)—Orsamentu Jerál Estadu (OJE) ba tinan fiskal 2021 ho total billaun $1.895 pasa iha final global ho votus 44, laiha kontra no abstensaun. Entretantu deputadu hamutuk 21 husi bankada CNRT la marka prezensa tanba konsidera governu daulu ne’ebé viabeliza husi FRETILIN inkonstitusional.

Orsamentu 2021 ho montante biliaun $1,895, foti hosi reseita fundu minarai biliaun $1,377 no
reseita naun petrolíferu millaun $508.

Hosi totál reseita fundu minarai biliaun $1,377, millaun $547 foti bazeia Rendimentu Sustentável
Estimadu (RSE) no transferénsia superiór liu RSE millaun $829.

Proposta-lei OJE 2021 kompostu hosi saláriu no vensimentu millaun $239,2, bens (sasán) no
servisu millaun $421,49, transferénsia públika millaun $669,91, kapitál minór millaun $61,14 no
kapitál dezenvolvimentu millaun $503,20.

Nune’e, liuhusi deklarasaun votus, Xefe Bankada KHUNTO, Olinda Guterres agradese FRETILIN tanba viabiliza governu lideradu Primeiru Ministru Taur Matan Ruak hodi Estadu iha fali OJE hafoin orsamentu sumba iha Janeiru 2019.

“Ha’u fó parabens ba maluk sira husi FRETILIN mai viabiliza governu ida ne’e, i eleisaun antesipada segunda-vez la mosu. Ha’u agradese maluk sira FRETILIN ne’ebé la so’e ami. Ami partidu kiikoan rua ne’e (KHUNTO-PLP), ami labele halo buat ida, maibé ami bolu ita boot sira mai viabiliza, la’ós ita boot sira mai tongka ami,” Olinda subliña.

Olinda agradese mós deputadu sira husi bankada PD, FM, UDT no PUDD ne’ebé fo mós votus a favor ba OJE 2021.

Maske nune’e, Olinda husu ba Governu atu ejekuta orsamentu ne’e ho didi’ak ba povu no nasaun nia di’ak.

“Orsamentu ne’ebé aprova ona, ejekuta halo didi’ak ba. Orsamentu ne’e ba povu tomak,” Olinda subliña.

Iha okajiaun, deputadu Mariano Assanami Sabino nu’udar Prezidente  Partidu Demokrátiku (PD), subliña,

“Orsamentu jerál estadu ba tinan ida ne’e, loloosita tenke halai liu ba haforsa rejilénsia ekonomia i soberania alimentar, maibé to’o remata orsamentu ita aloka ba agrikultura ne’e 1.7 (%),” Assanami kontinua kestiona. (cao)

No More Posts Available.

No more pages to load.