Entre TIR no Prizaun Preventiva ba Arguidu Sira Tortura Joven Na’in-2, Euclides: “Ami kontinua halo Operasaun”

by -126 views
Imajen ne’e hatudu iha momentu polísia ba halo buska iha uma ne’ebé arguidu sira halo torturasaun ba joven na’in-2 iha Beto Tasi.

Timor Post (26/03/2021)—Tribunál Distritál Dili (TDD), ohin, kontinua interoga no foti desizaun ba arguidu sira ne’ebé tortura joven na’in-2.

Komandante Daruak Polísia Munisípiu Dili, Euclides Belo ba Timor Post hatete, nia parte kontinua asegura arguidu sira iha sela polísia to’o bainhira tribunál foti desizaun Termu Identidade Rezidénsia (TIR) ka Prizaun Preventiva.

“Horiseik ami lori fali sira mai iha sela polísia no orsida tribunál kontaktu sei lori fali arguidu sira ba. Ohin, rona desizaun,” Euclides subliña.

Euclides afirma, maske prosesu justisa ba kazu ne’e la’o dadaun maibé husi parte polísia kontinua halo operasaun hodi buka tuir suspeitu sira liga ho kazu ne’e tanba, iha kalan hirak ikus ne’e sei mosu insidente hana iha sidade laran.

Iha loron Kinta (25/03/2021), TDD halo julgamentu dahuluk ba arguidu hamutuk na’in-7 ne’ebé futu lia hodi halo detensaun ilegál no tortura joven na’in-2 iha Beto iha loron 21/03/2021.

Arguidu na’in hitu, ho naran inisiala, DDJ, AS, JG, JODC, CM, ALB, DC, no MS.

Iha loron Tersa (23/03/2021), polísia halo buska ba arguidu sira nia rezidénsia konsege kaptura no prende sasan arte marsiál inklui farda IKS, Katana-2 no gás lacrimogêneo (gas air mata).

Iha interogasaun dahuluk ba arguidu sira iha TDD, Ministériu Públiku reprejenta vítima joven na’in-2 husu ba tribunál atu aplika prizaun preventiva ba arguidu sira. Inkuantu parte defeza husu atu tribunál aplika TIR.

Julgamentu ba kazu ne’e prezide husi juisa Maria Solana, vítima reprejenta husi Prokurador Rogério Viegás no arguidu sira akompaña husi advogadu  privadu na’in-2.

Entretantu husi parte polísia konsidera mós joven na’in-2 ne’ebé antes ne’e kumpri mós sela detensaun livre ona konsideradu vítima, maibé depois prosesu investigasaun la’o ba suspitu na’in 7, joven na’in-2 mos sei kumpri justisa nu’udar suspeitu ba kazu danu ka baku rahun ema nia uma no estraga sasan ne’ebé antes sira komete. (cao)

No More Posts Available.

No more pages to load.