ADVERTISEMENT

Ita Hotu-hotu Reja ba Avo Nana, “Hakfodak ho Ezijénsia FRETILIN”

Timor Post - Jeral
  • Share

Timor Post (20/11/2020)—Premiadu Nobel da Paz, José Manuél Ramos Horta husu ba timoroan hotu atu reja ba Nai Maromak hodi haraik bensaun ba Líder Nasionál Kayrala Xanana Gusmão, tanba povu Timor Leste sei presiza nafatin nia mahon.

“Ita hotu-hotu reja ba Nai Maromak haraik bensaun ba Abo Nana. Povu TL i Rai Doben ida ne’e sei presija nafatin Abo Nana nia mahon,” Horta hakerek apelu ne’e iha nia pájina offisiál Facebook relasiona ho Xanana hala’o viajen ba kontrolu saúde (check up) iha Jakarta-Indonézia.

Eis Prezidente Repúblika ne’e haktuir, Xanana nia kondisaun saúde di’ak hela, maibé kleur ona la halo kontrolu kompletu.

“MBX nia saúde di’ak lo’os. Maibé kleur ona MBX la halo check klean, kumpletu. Besik fulan ne’e remata MBX fila mai uma,” Horta hatete.

Entretantu Horta dehan, hakfodak ho notísia kona-ba Bankada FRETILIN tau kestaun ba servisu Embaixadór Timor Leste ba Japaun, Ilídio Ximenes liga ho Xanana nia partisipasaun iha konferénsia iha Japaun.

“Ha’u hakfodak ho notísia ida ne’e…Maun Boot Xanana ba check-up iha Jakarta. Antes de nia ba, MBX grava nia diskursu i haruka ba konferensia iha Tokyo. MBX la ba Tokyo. Embaixador TL Ilídio Ximenes iha Japaun partisipa iha konferénsia. Bankada ida ezije demisaun TL iha Japaun tan nia marka prezensa iha konferénsia akadémika ida?,” Horta hakfodak.

Entretantu Bankada FRETILIN iha Parlamentu Nasionál husu governu imediatamente ezonera Embaixadór Ilídio Ximenes tanba konsidera halo servisu hali’is liu ba partidu.

FRETILIN hato’o pozisaun ne’e hafoin haree Xanana nia partisipasaun no fó mensajen via zoom iha konferénsia internasionál Tokyo Parliamentary Peace Forum, ne’ebé organiza husi Parliamentary Committee of Diet of Japan and Japan Commission on Global Governance (JCGG) iha 18 Novembru 2020.

Francisco Miranda Branco, Prezidente Bankada Fretilín, hatete, razaun FRETILIN husu governu atu halo ezonerasaun ba embaixadór Japaun tanba nia hala’o serbisu aas liu interese grupu ka partidu nian la’ós tau interese estadu.

“Ami ezije ba governu atu halo ezonerasaun imediata ba embaixadór Timor-Leste iha Japaun hodi troka diplomata seluk ne’ebé reprezenta estadu Timor-Leste ho dignu, tanba sistematikamente ami akompaña ninia atividade sira ne’e mais orientadu ba interese grupu nian la’ós lori estadu Timor-Leste nia interese tanba ida ne’e mak ami ezije atu ezonera”, dehan Xefe Bankada liu hosi konferénsia imprensa iha sala Bankada Fretilín Parlamentu Nasionál, Kinta (19/11).

Maske nune’e, Embaixador Timor Leste ba Japaun, Ilidio Ximenes hato’o nia resposta badak kona-ba atake husi Bankada FRETILIN hasoru nia liga ho Lider Nasional Kayrala Xanana Gusmao.

Embaixador defende katak, durante ne’e nia hala’o kna’ar la ses husi interese estadu, povu no nasaun RDTL.

Maske nune’e, Ilidio dehan, kona-ba kestaun ne’e, nia sei ko’alia uluk ho Ministra Negosiu Estranjeiru no Kooperasaun (MNEK) molok ko’alia ba publiku.

“Di’ak, ha’u sei ko’alia no hato’o uluk ba MNEK,” Ilidio ba Timor Post husi Japaun hafoin rona konferensia ba imprensa husi Bankada FRETILIN, Kinta (19/11/2020) iha Uma Fukun Parlamentu Nasional hodi husu ba Governu lideradu Taur Matan Ruak atu halo ezonerasaun ba nia. (cao)

 993 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Ita Hotu-hotu Reja ba Avo Nana, “Hakfodak…” A few seconds ago

Lee Mós :
Governo deve apoiar rapidamente escolas afetadas por desastres naturais

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No