ADVERTISEMENT

Masakre Santa Krúz, Taur husu Foinsa’e Sira halo Reflesaun

Timor Post - Jeral
  • Share

Timor Post (11/10/2020)- Primeiru Ministru no Ministru Interior Taur Matan Ruak, iha komemorasaun loron juventude nasionál no loron masakre santa cruz 1991, husu ba juventude sira tuur hanoin fila-fali saida mak atu halo ba rai Timor-Leste.

“Ohin loron importante, loron ne’ebé iha tinan 29 ba kotuk, Juventude Loriku As’wain ho determinante no nakonu ho espíritu luta nian, hamriik hakilar ba mundu kona-ba ita-nia kauza luta ba ukun rasik-an. Iha loron ne’e duni nakfila sai trajédia boot “Masakre Santa Krús”, joven feto no mane barak mak raan nakfakar no balun lakon to’o agora.

Ho grasa filmajen Max Stahl nian, ne’ebé konsege sai ba li’ur maka loke mundu nia matan kona-ba trajédia nakukun ida ne’e, ne’ebé ikus mai mundu internasionál preokupadu kona-ba timoroan sira-nia sofrimentu hosi asaun brutalizmu hosi forsa okupante sira.

Hafoin restaurasaun independénsia 20 Maiu 2020, Governu deside data ida ne’e nu’udar Loron Nasionál Juventude, atu fó onra ba joven feto no mane sira ne’ebé masakradu iha loron refere.

Loron ida ne’e mós nu’udar loron reflesaun, liuliu ba joven sira ne’ebé foin boot hafoin ukun-an, tuur ba hodi refleta “SAIDA MAK HA’U BELE FÓ BA HA’U NIA NASAUN!” nune’e bele hatutan joven uluk nia misaun ne’ebé hatudu ona, sira harii hela Nasaun RDTL ne’ebé ohin ita hotu goza”, hateten

Primeiru liu hosi ninia mensajen ba loron istóriku ne’e.
Xefe Governu aproveita loron ne’e apela ba joven sira ikus ne’e atu prienxe ukun rasik aan ho matenek.

“Ba ha’u-nia oan joven sira, imi-nia misaun mak oinsá prienxe ukun rasik an ida ne’e, através edukasaun, no buka inovasaun, porké nasaun ne’e nia futuru iha imi nia liman, maibé só ba ema sira ne’ebé matenek, tanba mundu ohin loron kompetitivu maka’as, sé mak la aproveita tempu ne’e, nia sei hela iha kotuk”, hatutan eis segundu Komadante da Luta Libertasaun nasionál.

No eis Prezidente Repúblika ne’e rekoñese, “Ita-nia Nasaun foin hamriik tinan 18, Nasaun ho tinan 18, seidauk bele fó satisfasaun ba ema hotu-hotu, tanba ita-nia Estadu nia nesesidade barak tebes, enkuantu rekursu ne’ebé ita iha la sufisiente atu atende hotu iha tempu badak de’it.

Nia kompara nasaun sira ne’ebé ukun an liu ita tinan barak, hanesan timoroan, ita bele orgullu tanba ita la’ós Nasaun ida ne’ebé di’ak liu iha mundu, maibé mós la’ós aat liu iha mundu.

Hanesan Primeiru-Ministru, sei halo esforsu, kria kondisaun atu ita-nia nasaun la’o ba oin, no roda ekonomia la’o nafatin hodi kontribui ba kria kampu traballu ba ita-nia sidadaun sira. Hanesan ha’u dehan beibeik, Governu ne’e lakohi husik timoroan ida hela iha kotuk, mas para ida ne’e, ha’u-nia oan joven sira-nia kontribuisaun importante ba estabilidade.

“Ikus liu ha’u dejeza Ksolok Loron Nasionál Juventude ba imi hotu” konklui PM TMR.(Jornalista: Jaime Pires)

 533 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Masakre Santa Krúz, Taur husu Foinsa’e Si…” A few seconds ago

Lee Mós :
Aman Husi Mgr. Leandro Bispu Dioseze Baukau Hakotu Is

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No