Timor Post (11/11/2020)—Bankada Partidu Libertasaun Populár (PLP) preokupa ho orsamentu millaun $41.588 ne’ebé governu prevee iha proposta-lei Orsamentu Jerál (OJE) tinan fiskál 2021 hodi kompra de’it ekipamentu komputadór.
Deputada Maria Angelina Lopes Sarmento, rekorda durante hala’o kontaktu eleitorál iha baze, povu nia nesesidade prioritáriu liu mak água no saneamentu maibé iha área refere governu tau de’it millaun $3.449.
“Iha livru panorama orsamentál prevee kedas millaun $41.588 hodi kompra ekipamentu komputadór, durante ami halo kontaktu eleitorál povu nia nesesidade liu mak água no saneamentu”, Deputada PLP ne’e kestiona liu hosi plenária iha ámbitu audiénsia públika ho Ministériu Obra Públika (MOP), Ministériu Planeamentu no Ordenamentu (MOP) no Ministériu Transporte no Komunikasaun (MTK), iha Parlamentu Nasionál, kuarta (11/11).
Deputada Bankada PLP ne’e husu Prezidente Konsellu Administrasaun Fundu Infraestrutura (KAFI) no Vise-Primeiru Ministru, José Reis atu argumenta razaun ne’ebé halo governu prioritiza liu sosa ekipamentu komputadór iha OJE 2021.
Enkuantu setór agrikultura millaun $ 3.798, água no saneamentu millaun $3.449 de’it, dezenvolvimentu urbanu no rurál millaun $ 6.190, edifísiu públiku millaun $7.693, edifísiu edukasaun millaun $4.843, enerjia elétrika millaun $18.321. Mós prevee millaun $4.844 iha saúde, seguransa no defeza millaun $13.884.
Nune’e mós prevee ba solidariedade sosiál millaun $1.000, projetu tasi mane millaun $8.500, aeroportu millaun $19.843, preparasaun dezeñu no supervizaun ba projetu foun millaun $9.441, estrada millaun $105.215, ponte millaun $4.896, portu millaun $1.814, programa ba setór turizmu rihun $ 652, programa empréstimu millaun $70.700, programa setór finansas millaun $2.905, Sekretariadu Estadu Juventude no Desportu millaun $2.034, Komisaun Administrasaun Fundo Infraestrutura (KAFI) millaun $1.011, programa manutensaun no reabilitasaun millaun $6.924.
Proposta orsamentu jerál estadu ne’ebé propoen hosi governu ba tinan fiskál 2021 hamutuk biliaun $ 1895, kompostu hosi Saláriu no vensimentu millaun $ 239.26, bens servisu millaun $ 421.49, transferénsia publika millaun $669.91, kapitál menór millaun $61.14, no kapitál dezenvolvimentu milliaun $503.2.(Jornalista : Julio Salinas Soares)
617 total views, 6 views today
Oinsa Ita nia Reaksaun iha Notisia Nee?
You have reacted on “Maria Angelina lansa Kritika hasoru VPM José Re…”
Bele hare Video Seluk :
Subscribe to Timorpost
