Timor Post (04/11/2020)— Ministru Justisa Manuel Carceres hateten, Polisia Sientífiku Investigasaun Kriminál (PSIK) la’ós loron-loron kaer pistola parlenta iha estrada, maibé simu orientasaun atu ba kaptura ema mak foin lori.
“Gambar pistola iha facebook dehan ba PSIK ne’e la’ós ida ne’e ida, ne’e husik sira tau tanba sira lahatene saida mak sira ko’alia, maibé iha dekretu lei númeru 15 2014 ha’u seidauk mai Ministru ne’e kona-ba estatutu orgánika PSIK nia iha artigu 20 ne’e dehan PSIK lori no uza kilat no dekretu lei ne’e prezidente repúblika mak promulga”,Ministru haktuir ba jornalista sira iha Palasiu Governu, kuarta (04/11).
Kona bá bainhira maka PSIK bele lori kilat governante dehan, 2018 Konsellu Ministru hasai regulamentu ida bainhira mak PSIK ne’e bele uza nia pistola, no uza ba halo saida no uza oinsá.
“La’ós loron-loron nia parlenta iha Estrada ho fali pistola ne’e lae. Sira ka’er pistola tanba sira la’ós ba halo investigasaun kriminál de’it, maibé sira simu mós mandadu de kapturasaun hosi ministériu públiku ka hosi tribunal atu ba ka’er ema, entaun ba ka’er ida ema droga ho liman mamuk nia hurulele fali PSIK entaun kazu ne’e lakon tiha de’it.
Ne’ebé regulamentu númeru 25/2018 ne’e iha ne’ebá atu regula sira, se sira uza laloos duni sai tiha sira, tanba duni sai PSIK ida nia la halo rekursu ministru ba iha tribunal ida, ne’ebé sira la’ós loron-loron uza kilat parlenta iha estrada, maibé nia simu orden hosi tribunal ka hosi ministériu públiku dehan atu ba kaer Manuel kriminozu ne’e mak foin lori pistola ne’e ba ka’er Manuel kriminozu ne’e, hotu tiha mai hatama fali kedas iha armajen armas, ne’ebé iha regra de impeinamentu”, Nia esplika.
Ministru mós akresenta medida kilat mak 19/9 milímetru tanba la’os kilat boot ne’ebé tau de’it iha bolsu mós ema la hatene katak nia uza kilat ida.
Ministru garante sei kontrolu másimu hosi ministériu justisa rasik, tanba estatutu orgánika PSIK nia ne’e tutela ba Ministériu Justisa, ne’ebé sei kontrola hosi Ministériu.(Jornalista: Jaime Pires)
371 total views, 3 views today
Oinsa Ita nia Reaksaun iha Notisia Nee?
You have reacted on “Membru PSIK Atu ba halo Kapturasaun mak Foin Lo…”
