Timor Post (04/11/2020)- Ministru Defeza no Seguransa, Filomeno Paixão de Jesus hatete, forsa obrigatóriu ne’e posibilidade hatama ema na’in 600 kada tinan.
Eis Brigadeiru Jenerál F-FDTL adianta joven idade (18) atu tama dormitóriu ka la tama ne’e oin seluk, importante mak sira tenke ba halo resenseamentu ka ba inskreve katak prontu atu tama forsa obrigatóriu. Ba sira ne’ebé mak eskola boot, bele kontinua eskola hotu tiha lai mak mai fali tama militár obrigatóriu.
“Agora atu tama la tama ne’e ita hare lai fatin, tanba militár obrigatóriu ne’e nia durasaun to’o fulan 18, hotu-hotu sira fila kedas ba uma ba sira ne’ebé mak eskola boot, bele kontinua eskola hotu tiha lai mak mai fali tama militár obrigatóriu”, Ministru informa ba jornalista sira iha Palasiu Governu, kuarta (04/11).
Governante adianta tanba agora kondisaun infraestrutura seidauk iha tanba ne’e militár obrigatóriu aplika fazeadamenta ho ema atus neen-atus neen.
“Faze primeiru mak ita nia posibilidade hatama ema na’in 600 kada tinan, tanba seidauk iha infraestrutura barak, maibé ita kuandu hakiak infraestrutura barak lakleur ita sei hatama hotu”, dehan Ministru.
Enkuantu maneira atu rekolla joven idade 18 hodi tama forsa obrigatóriu Ministru dehan sei koordena kada suku no aldeia, inklui mós ministériu Administrasaun Estatál no mós sira ne’ebé mak iha relasaun ho ida ne’e tenke kontribui hotu, ba mós iha konsuladu sira no mós ba iha embaixada sira iha rai li’ur iha mós rai laran atu nune’e hotu-hotu bele kontribui.
” Agora ba tinan oin 2021 ne’e sei hatama joven sira forsa obrigatóriu ne’e hamutuk ema na’in 600 de’it, depois kria infraestrutura mak sei hatama hotu, agora posibilidade mak hatama uluk 600 kada tinan” Nia termina.(Jornalista: Jaime Pires)
563 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
Sorry, there was a YouTube error.