Timor Post (09/10/2020)- Vise-Primeiru Ministru no Ministru Planu Ordenamentu Territóriu, Jose Reis hatete, governu iha vontade buka solusaun ba projetu 44 ne’ebé uluk FRETILIN entrega ba ministériu públiku tanba deskonfia la iha kontratu.
“Uluk bankada Fretilín mak lori ida ne’e ba Ministériu Públiku maibé ministériu Públiku sei halo hela analiza to’o agora seidauk iha rezultadu ida. Projetu hamutuk 140-e tal projetu ne’e 90 ital mak foti ona desizaun atu selu tanba iha kontratu no 44 ne’e mak laiha kontratu “, dehan Ministru bainhira konfirma Iha Palasiu Governu, sesta (09/10).
Lider fretilín reforsa, maski 44 ne’e laiha kontratu maibé governu iha nafatin vontade atu bele solusiona problema ida ne’e.
“Tanba empreza balun halo tia ona servisu, entaun labele husik hodi sira sai vítima ba iha prosesu ida ne’e. Tanba ne’e mak ami buka hela solusaun oinsá mak atu rezolve problema ida ne’e” dehan ema daruak iha Governasaun Primeiru Taur Matan Ruak.
Primeiru Vice Sekretáriu Jerál Partidu Fretilín aprezenta nia parte simu ona orientasaun hosi atuál Primeiru Ministru Taur Matan Ruak oinsá projetu sira ne’e hatama hotu iha sistema GPS ka mapamentu eletróniku hodi bele ajuda no identifika projetu sira.
“Ne’e servisu ida ne’ebé UPMA (unidade planeamentu monitorizasaun no avaliasaun) halo tiha ona, iha projetu balun seidauk maibé ami tenta hela oinsá iha fulan ida ne’e nia laran presiza tun ba terenu hodi buka hatene loloos nia kordinatu ne’e halo nusa atu bele enkuadra ba iha sistema ne’ebé mak UPMA kria ona”, Ministru adianta.(Jornalista: Jaime Pires)
849 total views, 3 views today
