ADVERTISEMENT

Sosiedade Artístiku Sira Hasoru Malu ho Xefe Bankada FRETILIN

Timor Post - Jeral
  • Share

Timor Post (22/09/2020)—Atu re-abertura ba lei direitu autór no lei propriedade intelektuál nian, tersa (22/09), sosiedade artístiku Timor-Leste (SATL), kompostu hosi ALMAMOR, Pinturas no Poestas, hasoru malu ho Xefe Bankada FRETILIN, Francisco Miranda Branco.

Hafoin termina audiénsia, Konselleiru ba Artístiku Timor-Leste no eis Deputadu FRETILIN, Eládio Faculto, hatete SATL hetan konvite hosi Prezidente Bankada FRETILIN, Deputadu Francisco Branco, hodi fó konsiderasaun ba valor artístiku sira nian no artístiku sira nia vida iha futuru.

“Iha ne’e haree liu kona-ba le direitu autór, lei propriedade intelektuál nian.

Artístiku Timor-Leste hanesan sosiedade ida ne’ebé presiza mós iha atensaun hosi Estadu Timor-Leste, no iha ne’e mak lejizladór sira fó konsiderasaun boot, para hodi bele hasoru sira atu kolia kona-ba lei direitu autór ne’e”, informa Eládio ba jornalista sira iha PN.

Eládio admite katak, uluk sei hanesan deputadu, nia parte mak sai hanesan inisiadór ba lei nee, inklui mós deputadu sira ne’ebé mak iha momentu ne’ebá hamahan-an iha komisaun F (trata asuntu Kultura, Juventude, Desportu)
No iha momentu ne’ebá nia haktuir, entre 2016 to 2017, lei nee tama to ona iha finalidade, maibé to ona atu halo aprovasaun final global sira nia mandatu termina, entaun lei nee la konsege aprova no kaduka. Tanba ne’e, bainhira lei ruma kaduka tenke halo re-abertura fila fali.

Eládio hatete, iha audiénsia ne’e, bankada FRETILIN promete sei lori fali lei nee ba oin, para halo re-abertura. No nia promete ba oin sei hasoru malu fali ho Bankada Parlamentár sira seluk hodi kolia kona-ba kestaun ne’e.

“Ohin Prezidente rasik hatete ba ami katak, hosi Bankada FRETILIN sente katak artístiku Timor-Leste moris marzinalizadu, fó ezemplu de’it, kuandu artista Timor-Leste bainhira hetan tratamentu iha tempu selebrasaun ruma, artista Timor-Leste nee tratamentu ladún dia’k no artista sira hosi rai li’ur mai fó konsiderasaun boot”, dehan Eládio.

Eládio rekoñese patrimóniu kultura Timor-Leste nian balun ema lori sai ona ba rai li’ur, hodi reprezenta fali sira nian, inklui múzika sira ema halo bajakan.

“Ita nia patrimóniu sira hanesan kulturál nian, múzika sira ema halo bazakan, lori sasán sira nee ba iha rai li’ur, reprezenta fali sira nian, hanesan tais Timor ne’e preokupasaun, se lei nee la iha, ita atu kolia saida”, subliña eis membru deputadu ne’e.

Iha fatin hanesan, Prezidente ALMAMOR, Henrique do Rosário, introdús ALMAMOR hanesan sosiedade ketak ida kona-ba múzika nian, tanba nee nia parte fó bolu atensaun ba Estadu atu tau atensaun ba artista sira.

“Hosi parte ami nian, ami fó hanoin ba Estadu no Governu ida nee, osan barak liu fakar ba parte seluk, ezemplu hanesan desportu, ba iha li’ur fakar osan lubuk ida maibé la iha rezultadu, maibé artista hanesan MARVI, ba li’ur fakar osan oi-tuan de’it, maibé Timor nia naran morin iha mundu, tanba juara no halakon nasaun hotu. Maibé bainhira fila-fali mai artista marjinalizadu la valoriza”, dehan Henrique.

Henrique adianta, daudaun nee ALMAMOR rejista ona artista timoroan kuaze mill ital. No obra hosi artista sira nian seidauk rejistu hotu, maibé agora daudaun halo hela plataforma para atu harii sosiedade autores artista Timor-Leste.(Jornalista Julio Salinas Soares)

 850 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Sosiedade Artístiku Sira Hasoru Malu ho Xefe Ba…” A few seconds ago

Lee Mós :
PDHJ regista 140 queixas desde janeiro

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No