Timor Post (18/09/2020)-Professors Nain 15 iha Eskola Sekundária Jerál Dom Carlos Filipe Ximenes Belo Baukau, hanorin estudante durante tinan 7 sein salariu.
Kestaun ne’e levanta hosi Koordenadór Eskola Sekundária Jerál Dom Carlos Filipe Ximenes Belo Baukau, Carlos Ximenes Filipe ba jornalista sira hafoin remata hasoru mutu ho Prezidente Parlamentu Nasional, iha parlamentu nasionál Sesta (18/09).
“Problema nia hun ne’e mak professors nain 15 ne’ebé hanorin durante tinan 7 nia laran ona maibé governu liu hosi ministériu edukasaun seidauk rekoñese maski eskola Governu rekoñese ona, tanba ne’e maka ohin ami mai halo audiénsia ho Prezidente Parlamentu Nasionál ho nia ekipa tomak atu bele hatene hodi hato’o ba Governu atu buka solusaun kona ba problema ne’ebé professors hosi eskola Sekundária jerál Dom Carlos Filipe Ximenes Belo Baukau hasoru”, hatete Carlos Filipe Ximenes.
Koordenadór ne’e haktuir Ministériu Edukasaun promete dala to’o tolu atu resolve maibé realidade seidauk iha rezultadu.
“Primeir, iha loron 26 Setembru 2016 ministru edukasaun haruka ami mai iha INFORDEPE ho mós prezensa Amu Bispu Dom Carlos Filipe Ximenes Belo SDB, iha INFORDEPE haruka mós professors hotu mai sira promete dehan atu halo asina kontratu maibé realidade la asina kontratu, haruka ami fila fali ba Baukau. Segundu, iha loron 15 fulan Jullu Ministériu edukasaun fó orientasaun ba professors sira atu loke konta bankária, profesora sira loke duni maibé konta bankária mós mamuk hela nafatin. Datoluk, ekipa re verifikasaun hosi Ministériu Edukasaun ba iha eskola iha 16 de Augusto hodi dehan katak imi professors Nain 15 ne’e prienxe ona rekizitu, ne’ebé hein de’it atu asina kontratu, maibé iha loron 19 Dezembru 2019, 29 pesoas ne’ebé tama iha lista munisípiu Baukau ne’e na’in 14 asina na’in 15 la asina. Tanba ne’e mak ohin ami mai rekomenda ba Parlamentu Nasionál buka took Governu para oinsá atu bele buka solusaun atu professors Nain 15 labele sai fali vítima ba Governu”, deklara Koordenadór eskola.
Hatán ba problema professors sira nian ne’e Prezidente Komisaun G Parlamentu Nasionál, Deputadu Antonio Verdial, hatete hanesan reprezentante povu sai matan no tilun povu nian katak preokupasaun professors sira nian ne’e la’ós foin mai ohin lae maibé preokupasaun ne’e la’o kleur tebes ona.
“Klaru katak hanesan deputadu parlamentu nasionál labele ultrapasa governu ka ezekutivu nia serbisu, maibé parlamentu nasionál iha devér tomak atu hatutan professors sira nia halerik ne’e ba iha governu liuliu ba iha ministériu edukasaun juventude no desportu atu trata asuntu refere iha tempu badak” responde reprezentante povu ne’e.(Jornalista Julio Salinas Soares)
1,271 total views, 3 views today
Bele hare Video Seluk :
Subscribe to Timorpost
