Timor Post (17/09/2020)—Xefe Bankada Congresso Nacional de Reconstrução Timorense (CNRT) iha uma fukun Parlamentu Nasionál, Duarte Nunes afirma, nia parte hakarak haree vizaun polítika FRETILIN nian kona-ba Planu Estratéjiku Dezenvolvimentu Nasionál (PEDN).
“Kona-ba meta iha PEDN ne’e balun la atinje no ultrapasadu, maibé sira aprezenta ba mak ita hakarak haree took sira-nia vizaun polítika ne’e. Sira atu muda hotu ka atu hadi’a, maibé tenke aprezenta ba povu,” Xefe Bankada CNRT, Duarte Nunes hatete ba jornalista sira iha resintu Parlamentu Nasionál, Kinta (17/09/2020), relasiona ho deklarasaun hosi Sekretáriu Jerál FRETILIN Marí Alkatiri katak, la konkorda ho sistema ne’ebé durante ne’e iha.
Entretantu PEDN ne’ebé inisia no hetan ona aprovasaun iha Parlamentu Nasionál iha governu dahaat lideradu Primeiru Ministru Xanana Gusmão nia tempu, implementa ona kuaze tinan 15.
“Se nia (Alkatiri) la konkorda signifika nia sei muda hotu (PEDN), prontu, ne’e ninia direitu. Ita haree saida mak nia hakarak. Se muda tenke públika para ita hotu hatene depois mak implementa la’ós nonook de’it depois implementa,” Duarte subliña.
“Katak ke’e mak vizaun polítika ne’e, hakarak ukun mós ho vizaun ida ke sira-nian, hakarak muda sistema, sistema ne’e ita muda para ita hetan vizaun ne’ebé ke ita iha. Se vizaun ne’e mak muda signifika orsamentu mós tenke halai tuir vizaun ne’e entaun PEDN ne’ebé durante ne’e atu muda hotu bele muda ba,” Duarte salienta. (jmy/azu)
604 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
Sorry, there was a YouTube error.