Timor Post (10/09/2020)- Veteranu Faustino dos Santos ‘Renan Selak’ dada is ikus iha Hospital Nasionál Guido Valadares (HNGV) kinta (10/09) ho idade 63.
Saudozu moris iha 1 Maiu 1957 iha Suku Fuiloro Munisípiu Lautem. Iha nia vida fó tempu barak ba luta libertasaun iha frente armada durante tinan 24 iha Ai-laran.
To’o TL restaura independénsia iha 2002 matebian fó nafatin nia kontribuisaun nu’udar reprezentante povu ka deputadu Parlamentu Nasionál iha tinan 2007-2012 hamutuk ho partidu UNDERTIM.
Ministra Saúde (MS) Odete Belo, hateten pasiente veteranu frente armada ne’e alende idade sofre ho moras iha fuan, tanba ne’e tempu ne’ebé de’it bele husik nia moris.
“Renan Selak ninia idade no nia moras sofre korasaun maski la haruka ba mós iha ne’e bele halo tratamentu soke nia moras Gagal Jantung ne’e tempu ne’ebé de’it ita bele husik ita nia moris”, hateten Ministra.
Membru VIII Governu esplika nia parte prinsípiu la hatama naran veteranu ne’e ba lista transferénsia tanba regra atu transfere pasiente ba rai liur ida agora la hanesan ho uluk.
“Ha’u la presiza nia naran tama iha transferénsia, tanba transferénsia ne’ebé mak ita halo agora la hanesan. Uluk ita hakarak halo transferénsia lansung ba ona tanba aviaun no transporte la’o normal hela, maibé agora ne’e lae, hakarak halo transferénsia tenke hein desizaun hosi Hospital Indonézia nian, tenke hein imigrasaun Indonézia no Ministériu Negósiu Estranjeiru Indonézia nian”, informa Odete Belo ba jornalista sira iha ministériu Finansas Ai tarak Laran, kinta (10/09).
Governante ne’e afirma Governu prontu atu haruka ba maibé ema nia nasaun mós iha nia kritériu sira tempu covid-19 entaun susar atu fó dalan.
“Ha’u mós komprende veteranu Renan Selak ninia idade no nia moras sofre korasaun maski la haruka ba mós iha ne’e bele halo tratamentu soke nia moras Gagal Jantung ne’e tempu ne’ebé de’it ita bele husik ita nia moris” Nia hakotu.
Saudozu Renan Selak mate husik hela Fen ho oan 6 feto 3 no mane tolu iha Suku Fuiluru Munisípiu Lautem. Deskansa ho Hakmatek Hein Katak Imi Hotu Nia Klamar Sei Simu Hosi Na’i iha Nia Reinu Lalehan.(Jornalista: Jaime Pires)
941 total views, 6 views today
Bele hare Video Seluk :