DILI—Konsiente ka lae Timor Leste tama tiha ona iha perigu nia laran liuliu situasaun sosial no ekonomia, iha ne’ebé governu troka ba mai maibé laiha impaktu ne’ebé povu sente. Nune’e obriga ukun nain sira atu tau atensaun ho sériu.
“Ita tenke hamutuk. Parlamentu ho governu tenke hanoin ida ona atu halo duni mudansa. Ita labele hela nafatin de’it ho ko’alia,” afirma deputadu bankada PD, Mariano Assanami Sabino iha nia intervensaun iha diskusaun loron daruak jeneralidade Orsamentu Jerál Estadu (OJE) ba tinan fiscal 2020 nian.
Assanami hatete, problema boot liu ne’ebé governu tenke fo prioridade maka agrikultura, i iha seitor ida ne’e tuir nia xave maka parajen, iha ne’ebé husi kedas nia tempu inisia ona, maibé to’o agora governu la fó importánsia.
“Udan been mai estraga buat hotu-hotu maibé ita la konserva bee iha tempu udan,” Assanami dehan.
Ba oin, atu rejolve problema ida ne’e, eis ministru agrikultura no peskas iha governasaun AMP dahuluk nia ukun ne’e subliña, iha debate OJE 2020 nian ne’e parlamentu nasional ho governu tenke aposta ida ne’e ba prioridade dahuluk iha seitor agrikultura.
“La’ós de’it sé mak ukun sé mak la ukun, maibé responsabilidade,” nia hatutan.
Durante ne’e, Prezidente Partidu Demokrátiku ne’e hatete, ukun nain sira mout tiha ona iha interese partidu nian. Nune’e la tau a’as interese estadu nian hodi loke dalan ba pensamentu sira diskriminativu, explorasaun.
“Konstruksaun estadu RDTL, labele fo fatin ba explorasaun ema ho ema, labele iha diskriminasaun. Ita mout tiha ona iha interese partidu nian,” Asanami salient.
“Agora naran katak ita hotu la’o, maibé haluha tiha ona objetivu ba ukun rasik an, valores ukun rasik an maka konsisténsia ba saida mak timoroan sira hakarak halo liuliu povu kbiit laek sira,” nia dehan.
Maske nune’e, Assanami dehan, pasu ida ba seluk sempre hasoru dezafiu, maibé tenke halo duni mudansa iha governu ida troka ba governu seluk labele sai retórika de’it. (cao)
1,161 total views, 6 views today
Bele hare Video Seluk :