Timor Post (14/08/2020)-Deputadu Komisaun B ne’ebé trata asuntu Negósiu Estranjeiru Defeza no Seguransa iha Parlamentu Nasionál, David Dias “Mandati” husu ba autoridade seguransa komandu polisia Munisípiu Baukau buka grupu organizadu ne’ebé halo brutalism no sunu motuk uma komunidade iha Laga-Nunira.
“Parte seguransa liuliu ba komandu polisia Baukau tenke identifika ona grupu ne’ebé halo fali dez orden públiku ida ne’e,” afirma Mandati iha parlamentu nasionál Sesta (14/08).
Deputadu hosi Munisípiu Baukau realsa, katak lei hatete ema ida labele iha autoridade halo justisa ba nia liman rasik.
“Sé iha krime ida ba halo tan krime seluk ne’e labele resolve problema. Ita ema ne’e iha direitu auto-defeza ne’e loos, mas kria instabilidade ba sosiedade iha fatin ruma ne’e labele”, hatutan deputadu.
Reprezentante povu ne’e husu governu liuhosi polisia tenke halo operasaun hodi identifika, tanba povu hakarak moris hakmatek, hakarak moris armonizada, labele husik povu halai tun sa’e.
Maski autoridade civil no seguransa hosi Munisípiu Baukau husu beibeik ba juventude Baukau atu transforma Baukau Muturabu ba Baukau Muturau, maibé asaun krime sei kontinua akontese.
Iha semana ida ne’e laran akontese kazu rua iha Munisipiu Baukau hanesan tentativa omisídiu iha merkadu vila nova, no danu agravadu (sunu-uma) iha Suku Nunira Postu Administrativu Laga Munisípiu Baukau.(Jornalista Julio Salinas Soares)
648 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
Sorry, there was a YouTube error.