Timor Post (13/0/2020)- Prezidente Kompañia Santos, José Lobato, hasoru malu ho Ministru Prezidénsia Konsellu Ministru Fidelis Magalhaes, iha Palasiu Governu Kinta (13/08) hodi informa kometimentu kampaña nian atu fura tan mina matan 3 iha Bayu Undan.
Hanesan públiku hatene, antes ne’e operadór Bayu Undang ninian mak ConocoPhillips, depois ConocoPhillips deside fa’an nia partisipasaun iha Bayu Undang, Santos mak sosa, ohin loron Santos mak iha partisipasaun boot liu iha Bayu Undang kuaze porsentu 60 liu no mós sai operadór.
“Kompañia ConocoPhillips ho Santos iha buat balun mak hanesan mak estimasaun ba produsaun Bayu Undang ninian ho mina matan ne’ebé mak iha ne’e maizumenus to’o Janeiru 2022. Ne’e estimasaun klaru, dala ruma bele akontese maran antes dala ruma bele liu. Maibé diferente mak hosi kompañia ConocoPhillips lakohi iha disponibilidade atu investe liu tan iha Bayu Undang, maibé kompañia Santos, nia iha hanoin katak bele investe tan iha Bayu Undang. Kompañia Santos nia hanoin atu investe tan iha Bayu Undang mak atu baku ka fura tan mina matan tolu (3) iha Bayu Undang ho orsamentu maizumenus $ 200 milaun ital, neste momentu ita iha diskusaun ho ANPM nu’udar reguladór setór petróleu ninian” adianta jerasaun patriota.
Eis jerente kampaña ConocoPhillips ne’e mos dehan, se investimentu ne’e aprova duni hosi ANPM, entaun bele dada naruk tan produsaun mina ninia maizumenus tinan ida tan, tanba estimasaun mak Janeiru 2022 ne’e mina maran ona, entaun baku tan mina matan tolu bele dada naruk tan ba tinan ida tan.
José Lobato subliña orsamentu $200 milaun ital ne’e osan mai hosi kompañia rasik no kompañia sira ne’ebé mak hamutuk iha Bayu Undang ne’e mak sei tau osan hamutuk hodi fura mina matan ne’e. Tanba governu mak na’in ba produsaun, agora investimentu ne’e hosi kompañia sira, no kompañia sira mak tenke hatama osan, entaun ko’alia kona-ba Bayu Undang la’ós kompañia Santos de’it maibé iha kompañia barak ne’ebé tama iha Bayu Undang, entaun kompañia sira hotu mak tenke kontribui ba porsentu atu fura mina matan tolu ne’e.(Jornalista Jaime Pires)
1,161 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
1
/
1886
MISSA PASKOA KINTA-FEIRA SANTA IHA KAPELA MARIA AUXILIADORA FOMENTO I
PNTL Selebra nia Aniversariu ba Dala 24 iha Resintu Kuartel UEP
XANANA LANSA EMISAUN LISENSA EXPLORASAUN IHA LAUTEM
1
/
1886