Timor Post (06/08/2020)-Bankada Governu CNRT atuál opozisaun iha Parlamentu Nasionál kestiona ezekusaun fundu COVID-19 ne’ebé foin atinji 48%.
Hare ba persentajen ne’e Vice-Xefe Bankada CNRT Patrocínio Fernandes, hatete Governu goja de’it priviléjiu estadu, troka de’it ema, maibé la iha responsabilidade.
“Iha relatóriu kona-ba estadu emerjénsia hatudu katak, orsamentu ba fundu covid nian millaun $150 aumenta millaun $70 sira (governu) ezekuta de’it porsentu 48. Ne’e hatudu katak laiha kapasidade, servisu sira ne’e des-organizadu,” dehan Patrocínio Fernandes, Iha Parlamentu Nasionál, kinta (05/08).
Polítiku ne’e adianta membru governu hetan seguransa ho karreta rua-rua maibé ema sira ne’ebé sakrifika aan hanesan bombeirus, otél-nain, barak maka sidauk hetan pagamentu.
“Durante nee ema sira ne’ebé sakrifika sira nia aan ba risku hodi koopera ho governu hodi apoiu polítika kombate covid, hanesan seguransa sivíl, bombeiru sira ba iha fatin-fatin hodi dezinfeta ba karreta no dalan sira hotu, jornalista sira ba buka informasaun iha fatin risku sira hodi fó sai informasaun ba públiku, mais too agora laiha pagamentu, eskolta sira bele karreta rua tuir Ministru ida ka Sekretáriu Estadu ida, iha Dili laran hanesan mós situasaun emerjénsia, ikus rezultadu mak ida ne’e hatudu momoos governu laiha kapasidade. At liu informasaun ne’ebé mak ita rona katak, membru governu ta’uk atu asina dokumentu relasaun pagamentu sira nee, hakarak mak ba tuur iha priviléjiu sira hanesan Ministru, Vise-Ministru no Sekretáriu Estadu sira, mais sira halai hosi responsabilidade atu halo pagamentu ba ema-nia Oteis,” kestiona deputadu.
Opozisaun ne’e adianta dalaruma tinan ida tomak Governu sei foka ba atu hasai ema, troka ema, troka malu, ne’ebé sira sei la halo buat ida.
“Sira sei halo mak ida ne’e, enkontru urjente lalais atu troka diretór ida ka troka diretór jerál ida ka diretór nasionál ida iha instituisaun sira, buka atu troka ema de’it sira nia servisu mak ida ne’e,” hakotu deputadu.(Jornalista : Julio Salinas Soares)
707 total views, 3 views today
Bele hare Video Seluk :
Subscribe to Timorpost
