ADVERTISEMENT

Eid al-Adha fó Hanoin Profeta Abrahão nia Espíritu Sakrifísiu, Lú Olo Kontribui Karau Ida

Timor Post - Dili · Internasional
  • Share

Timor Post (31/07/2020)—Tinan-tinan komunidade musulmanu iha mundu inklui Timor Leste selebra loron Eis al-Adha ka loron sakrifísiu hodi fó-hanoin kona-ba profeta Abrahão nia espíritu sakrifísiu.

Selebrasaun ba tinan ida ne’e hala’o iha Masjid Anu’ur, Kampu Alor, Prezidente Repúblika Francisco Guterres Lú Olo entrega direta karau ida nu’udar sentidu solidariedade.

Iha mensajen Xefe Estadu nian, hato’o haksolok ba fiar-nain musulmanu sira hotu, sidadaun timoroan hela iha Timor-Leste ka iha rai-li’ur. Hato’o mós haksolok ba sidadaun estranjeiru sira ne’ebé selebra Eid al-Adha, iha rai doben Timor-Leste ka iha nasaun seluk.

Iha mensajen, Lú Olo konsidera liuhusi selebrasaun koletiva ida ne’e, ema musulmanu sira haburas babeibeik fiar no solidariedade entre ema.

Maibé tanba moras covid-19 hada’et maka’as hela iha mundu, iha rai barak, serimónia signifikativu ida ne’e labele hala’o di’ak tinan ida ne’e, tuir maluk musulmanu sira-nia hanoin no hakarak.

Iha ita-nia país viziñu, Indonézia, autoridade no grupu musulmanu sira husu ba fiar-nain sira atu hatuir medidas ne’ebé Governu foti atu hasees ka kontrola moras covid-19. Iha área sira ne’ebé risku aas tebes atu hetan moras covid-19, hamutuk 33, proibidu halo serimónia relijiozu iha meskita sira. Ba área sira seluk, autoridade sira husu ba hothotu atu hatuir protokolu saúde nian. Iha rai Indonézia mate ona ema besik rihun lima tanba covid-19.

Timor-Leste sei iha hela risku laran enkuantu moras covid-19 lao hela iha mundu.
Ha ‘u aproveita festa Iduladha nian hodi husu ba fiar-nain musulmanu sira atu ajuda autoridade Timor-Leste eduka alin sira atu hatuir nafatin rekomendasaun husi Ministériu Saúde Timor-Leste: fase liman beibeik, uza máskara no halo distansiamentu sosiál.

Eid al-Adha la´ós de’it festa ida ba fiar-nain musulmanu maibé atu selebra mós ho bin-maun-alin hotu-hotu ho fiar ne’ebé de’it. Oho karau no fahe oituan-oituan ba uma kain viziñu hatudu jestu rekoñese ema nu’udar ema no haforsa relasaun husi ema ba ema.

Eventu musulmanu ida ne’e ajuda hanorin dadaun ita-nia ema katak la iha fronteira entre ita ema tanba relijiaun ka diferensa ne’ebé de’it.
Ida ne’e hahalok boot ida ne’ebé Prezidente Repúblika valoriza tebetebes iha ita-nia sosiedade ohinloron nian.

Relasaun simu malu mak hakiak pás iha ita ida-idak nia laran no ba ita-nia rai doben Timor-Leste. Simu malu hariku ita ida-idak, nu’udar ema hatene moris hamutuk ho domin, iha diversidade laran. (cao)

 743 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Eid al-Adha fó Hanoin Profeta Abrahão nia Espír…” A few seconds ago

Lee Mós :
DNTT Produs Blanku Hamutuk 7.149

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No