DILI—Derepente de’it Paulina Dias Ximenes alias Nina, nia imajen ema públika iha rede sosial ho kondisaun laiha ona iis. No deskonfia Nina mout iha tasi laran.
Antes ne’e, Nina hetan baku husi joven lubuk ida, iha ne’ebé hatudu iha video ne’ebé sai viral iha fulan hirak liu ba iha pájina Facebook.
Tuir sasin ne’ebé koñese mós Nina iha tempu rejisténsia, Tenenti Andreia Rangel haktuir, Nina hetan moras mental kleur ona iha era ukun an.
Iha tempu okupasaun Indonézia, Nina nu’udar feto foin sae ne’ebé partisipa mós iha demostrasaun 12 Novembru 1991 iha Santa Kruz. Nune’e mós nu’udar membru ba organizasaun klandestina Brigada Negra.
Nina nia isin mate, membru Unidade Polísia Marítima maka lori sai husi tasi ibun Lesidere, Domingu (01/12/2019), oras, besik tuku 12.
Hafoin hetan Nina nia isin mate, sasin ne’ebé lakohi temi nia identidade haktuir ba Timor Post katak, Nina deskonfia mout iha tasi laran maka laloran baku no lori sai ba tasi ninin.
Hafoin rona Nina nia mate, ema ne’ebé koñese Nina no sobrevivente ba funu kontra inimigu hato’o sira nia sentimentu triste no haktuir instória kona-ba Nina iha rede sosial Facebook.
“Alin Nina, ha’u lahatene katak, o nia tempu ho ha’u maka ida ne’e de’it. Ha’u lahatene katak, besik fulan ida liu ba, o mai buka ha’u, o nia tempu ikus. Maromak simu Nina, iha Ita Bot Nia Kadunan Santu. Descansa Em Paz, Nina”. Bella Galhos hakerek iha imajen sira ne’ebé hatudu Nina ho kontente haan hamutuk hela ho família ida ne’e.
“DEP Nina, 28 Novembru ne’e Nina sei partisipa Komemorasaun Independensia iha Praca Da Proclamacao Independensia. Triste tan lakon sobrevivente ida hosi rezistensia klandestina nian. Fulan hirak liu ba Nina sei ba halimar iha Centro Chega! no Komite 12 Novembru”. Hugo Fernandes halo komentariu iha publikasaun Dino Hanjam.
“Descansa Em Paz Nina. Nina nu’udar sobrevivente Masacre St Cruz. Nia hili hakotu nia moris no nia sofremento ne liu husi dalan ida ita hotu la espera. Tuir informasaun nia tama ba tasi no hamout an”. Dino Hanjam.
Iha públikasaun seluk, Dino Hanjam haktuir konversa ne’ebé Nina nia aman haktuir molok rona Nina mate, “horibainrua antes nia atu sai husi uma nia sei husu hela osan $2 mai ha’u…ha’u fo tia ba, hafoin nia mos ba dadauk.. no ikus nia hakotu vida ho hakotu nia sofrementu moras ne’e husi dalan ida nune..”
Hafoin nia aman haktuir tan, “Karik Estado ou organizasaun rezistensia sira rekoñese nia nu’udar feto rezistésia ida ne’ebé mak uluk ho otas labarik nia partisipa ona iha luta ba ukun rasik an, entaun halot nia ba tuir prosesu ida ne’ebé mak dignu, ami família apóiu tuir ami nia kbit… Ami halo ona buat hotu, ha’u nu’udar aman sente triste tebes tan ha’u nia oan feto sofre moras ne’e kleur ona no ikus tenke lakon nia husi ami nia moris, maibé destinu iha Nai Maromak nia liman…”
Nina nia isin mate família sira lorri ona ba tau iha mate uma Lurumata, Dili -Edefísiu CCF nia kotuk.
Notísia ne’e hatun Timor Post seidauk hetan konfirmasaun husi polísia kona-ba prosesu investigasaun ba motivu loloos Nina nia mate. (cao)
1,543 total views, 3 views today
Bele hare Video Seluk :
Subscribe to Timorpost
