Timor Post (21/07/2020)-Deputada Bankada Parlamentár CNRT Lucia Taeke, husu ba ministériu ne’ebé vizita ba Oekusi labele tula karreta barak, atu fó espasu ba emprezáriu públiku sira hodi foos ba rai ketan tanba, foos folin karun.
“Ita hatene katak agora ne’e Ro-ahi Susesu iha hela prosesu manutensaun, iha Ro-ahi Nakroma de’it ba no mai Oe-Kusi, Atauru, Dili. Husu mós ba ministériu sira ne’ebé mak ba Oe-Kusi tula karreta labele barak tanba, karreta barak kada ministériu ida okupa fatin iha Ro laran la fó espasu ba emprezáriu Públiku atu tula foos ba rai ketan Oe-Kusi. Komesa semana kotuk foos folin sa’e, saku ida $ 25”, levanta deputada iha Uma Fukun Parlamentu, tersa (21/07).
Entretantu Ministru Asuntu Parlamentár ba komunikasaun sosiál, Francisco Martins da Costa Jerónimo, hatán sei halo komunikasaun ho parte Rejiaun Administrativu Espesiál Oe-Kusi Ambeno (RAEOA) ninian.
“Husu lai Iha ne’ebá katak loos duni ka la’e, hodi bele fó solusaun ba kestaun, ha’u mós lakohi adiente informasaun iha Plenária laran tanba ha’u seidauk iha info ruma ba foos folin sa’e duni ka lae,” dehan ministru Jerónimo.
Entretantu kona-ba manutensaun Ro ahi Susesu nia parte to’o ohin loron seidauk simu informasaun husi Ministru Transporte.(Jornalista Julio Salinas Soares)
561 total views, 3 views today
Oinsa Ita nia Reaksaun iha Notisia Nee?
You have reacted on ” Oekusi Foos Saku Ida Folin U$ 25, Deputadu Hus…”
