Timor Post (22/07/2020)-Prezidente Kámara Komérsiu Indústria Timor-Leste (CCI-TL), Oscar Lima, Kuarta (22/07) hasoru malu ho Prezidente Parlamentu Nasionál (PPN), Aniceto Guterres, hodi husu ba parlamentu fó hanoin ba governu implementa lei Pra-Kualifikasaun, no fó konfiansa ba Timoroan.
Lima ezije lei ne’e tenke implementa hodi fó konfiansa ba emprezáriu rai laran atu situasaun susar hanesan covid-19 kompañia rai laran iha nafatin ninia responsabilidade.
“Tan saida mak ita tenke husu fó benefísiu ba emprezáriu sira, ita haree ho Covid ida ne’e hatudu momoos mai ita, kuandu to’o tempu livre emprezáriu internasionál sira koopera hamutuk ho ita maibé tempu susar sira soe hela ita sira ba ona sira nia rain, entaun emprezáriu nasionál sira tenke tau iha kabas”, Oscar Lima informa ba Jornalista sira hafoin enkontru ho PPN iha Parlamentu Nasionál Kuarta (22/07) .
Lima hatutan, objetivu prinsipál hasoru ho PPN atu husu parlamentu nia apoiu buka solusaun ba dekretu balu ne’ebé sei soke malu, prinsipalmente lei aprovizionamentu no lei pra-kualifikasaun.
“Lei Pra-Kualifikasaun ho lei aprovizionamentu la han malu, iha lei aprovizionamentu tender millaun ida ba leten kategoria ba kompetetivu internasionál, iha fali lei pra-kualifikasaun ne’e tender millaun 7 mai kraik ne’e kategoria kompetetivu nasionál. Ohin ami mai hasoru Prezidente Parlamentu Nasionál, Aniceto Guterres, hodi ko’alia halo nusa mak atu bele ajuda buka solusaun”, hatutan Oscar Lima.
Entretantu Prezidente Parlamentu Nasionál, Aniceto Guterres, rekoñese setór privadu elementu ida importante save ba dinámika ekonomia país nian.
“Ohin Prezidente CCI-TL hato’o sira nia preokupasaun barak mai iha parlamentu, maibé parlamentu hanesan órgaun desizaun polítika, órgaun ne’ebé nia ba halo fiskalizasaun, halo lejizlasaun, tuir ninia funsaun parlamentu sei halo ninia knar ninia intervensaun oinsá atu hametin, atu reforsa setór privadu”, hatán PPN Aniceto
Kona bá entre lei ida ho lei seluk la han malu karik presiza harmonize, presiza mós atu kompleta lei sira ne’ebé seidauk iha, karik presiza iha parlamentu sei hola parte para kompleta.(Jornalista Julio Salinas Soares)
870 total views, 3 views today
Oinsa Ita nia Reaksaun iha Notisia Nee?
You have reacted on “Emprezariu Timoroan husu Pra-Kualifikasaun”
Bele hare Video Seluk :
Subscribe to Timorpost1
/
1949
TENKE REKRUTA JERASAUN FOUN REFORSA BOMBEIROS
ASANAMI HUSU TENKE APOIU BOMBEIROS
ASANAMI: ONRA BA TIMOR LESTE SELEBRA REVOLUÇÃO DOS CRAVOS BA DALA-50
1
/
1949
