Timor Post (21/07/2020)-Ministru Obras Públiku (MOP) Salvadór Pires hasai funsionáriu Nain lima (5) tanba ezije sira nia direitu iha estadu emerjénsia.
Funsionáriu hirak ne’e maka hanesan, João Batista Verdial, Nelio Assunção de Jesus, Junito Estêvão Araújo Reis, Januário Ivan Dias Marçal no Elo King Benay da Costa Marques.
Situasaun ne’e sai preokupasaun Deputadu bankada parlamentár KHUNTO no CNRT iha plenária Tersa (21/07) no reprezentante povu husu ministru bolu fila fali nia funsionáriu, tanba maneira motiva ho dalan hasai ne’e ladi’ak.
“Ita haree funsionáriu tékniku EDTL Nain lima iha Hera ne’ebé ministru hasai tiha hosi sira nia Servisu. Ida ne’e ladún di’ak. Atu motiva maluk Timor oan sira la’ós ho hahalok hasai, ne’e ita halo ita nia maluk sira laran moras de’it, KHUNTO simu informasaun hosi ita nia maluk sira ne’e balu serbisu tinan 8, balu tinan 5, balu tinan 3. Tanba ne’e mak bankada husu ministru atu bolu fila fali funsionáriu Nain lima ne’e para ko’alia didi’ak ho sira, bele reativa fila fali serbisu hanesan funsionáriu EDTL hanesan baibain, tanba sira serbisu tina naruk ona,” hatete Deputadu Luis Roberto, iha Plenária Tersa (21 /07).
Vise-Prezidente PN, akresenta katak desizaun Ministru nian la lójika tanba Ministru hasai nia funsionáriu ne’ebé ezije sira nia direitu hanesan primeiru liña iha Covid-19 nian.
“EDTL mós iha liña oin hotu, funsionáriu sira ne’e ezije nia direitu maibé ministru foti desizaun hosi hasai, ida ne’e masuk akal ka lae. KHUNTO hanesan Bankada governu, hakarak hatete buat ne’ebé sala dehan sala los mak dehan los, labele hatudu hahalok ida buka hasai de’it ne’e labele, husu ba ministru atu bolu fali sira Nain lima para resolve “, afirma deputadu.
Nune’e mós Vise Xefe Bankada CNRT deputadu, Patrocínio Fernandes hatete, ministru iha mos problema seluk ho kompañia seguransa guardamor no Seguransa Lorosa’e.
“Ha’u hakarak hatete ministru Salvador durante ninia mandatu ne’e kria mak problema de’it, buat ida nia halo ne’e estudu hela de’it, maibé problema barak mak nia halo, kria problems entre kompañia Guardamor ho kompañia Lorosa’e to’o agora sei dauk resolve, halo tenderizasaun ba kompañia ne’ebé manan atu fornese mina ba sentrál elétrika to’o agora lala’o tanba kompañia laiha kapital atu bele fornese mina, ninia serbisu mak hasai funsionáriu hosi fatin hotu”, hatete Patrocínio iha Parlamentu.
Hatán ba preokupasaun ne’e Ministru Assunto Parlamentár no Komunikasaun Sosiál (MAPKOMS) Fransisco Jerónimo, hatete, nia parte toma nota no rejistu preokupasaun sira no bainhira liu hosi Konsellu ministru mak foin relata ba iha ministériu kompetente.
To’o notísia ne’e públika, Timor Post seidauk hetan konfirmasaun husi Ministru Salvadór kona-ba rajaun lolos husi informasaun ne’ebé deputadu sira levanta. Nune’e mós Timor Post tenta hela halo entrevista ho funsionáriu na’in-lima ne’ebé naran temi. (Jornalista Julio Salinas Soares)
785 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
Sorry, there was a YouTube error.