Timor Post (06/07/2020)-Deputada hosi Bankada CNRT, Maria Barreto ‘Boromali’, kestiona kondisaun eskola Sekundáriu Santo Agostinho Bobonaru ne’ebé hetan estragu hosi inundasaun iha fulan Fevereiru 2020 seidauk halo manutensaun hosi ministériu edukasaun.
“Eskola ida ne’e hetan estragu iha fulan Fevereiru 2020 hosi udan boot bee sobu baleta no tama ho iha eskola laran halo eskola ne’e hetan estragus grave tebes, maibé parte edukasaun seidauk halo manutensaun,” Boromali kestiona iha plenária PN segunda (06/07).
Reprezentante povu dehan daudaun ne’e eskola reativa ona atividade tuir prosesu aprendizajen maibé labarik estudante eskola refere sei hein hela tanba kondisaun eskola sei at hela.
Nia hatutan edukasaun Munisípiu Bobonaru halo ona vizita maibé seidauk iha rezultadu ruma atu resolve asuntu ida ne’e.
Iha parte seluk deputada Partidu CNRT ne’e kestiona mós kondisaun infraestrutura liuliu Munisípiu Bobonaru nian.
“Sé ita boot sira ba iha Bobonaru karik, iha Postu Maliana Villa, hosi Mercado ba iha Suku Raifú, Ritabou no tuun ba to’o iha Mau Mali iha ne’ebá ESTRADA ida ne’ebé halo konstrusaun maibé oras ne’e daudaun abandona hela” kestiona Maria.
Deputada lamenta kuandu karreta ka motorizada ida liu halo rai rahun suar maka’as fó impaktu ba saúde komunidade sira ne’ebá tanba rai rahun tama hotu komunidade nia uma.
“Agora daudaun komunidade iha Raifu, Ritabou hetan moras respiratóriu (ISPA) maka’as liuliu ba labarik sira, ferik ho katuas iha sentru saúde no Postu saúde sira iha Bobonaru” subliña.
Deputada opozisaun ne’e husu ba governu liuliu Ministériu Obra Públiku atu fó hanoin ba kompañia obra konstrusaun hodi finaliza ninia servisu.(Jornalista Julio Salinas Soares)
647 total views, 3 views today
