Timor Post (06/07/2020)- Ministru Finansas Fernando Hanjam, hafoin relata servisu ba Primeiru Ministru Taur Matan Ruak iha Palasiu Governu Segunda (06/07) hateten, Orsamentu Jerál Estadu (OJE) tinan fiskál 2020 ne’e sei la prevee ba kapitál menór no dezenvolvimentu, tanba tempu la biban atu implementa projetu foun.
Ministru hatutan Primeiru Ministru mós husu Ministériu finansas bolu diretór kada ministériu esplika kona bá tetu orsamentu $1.492.3 Biliaun ne’ebé Konsellu Ministru aprova tiha ona, orsamentu sei hatama ba parlamentu nasionál iha loron 15 fulan Setembru, maibé sei la prevee Kapitál Menór no Kapitál dezenvolvimentu.
“Orsamentu ida ne’e ita sei halo pagamentu ne’e ba iha saláriu vensimentu no mós ba iha ben servisu, agora kapitál menór tempu ne’e badak liu, se ita halo prosesu aprovizionamentu iha fulan rua de’it mós la to’o tanba prosesu aprovizionamentu naruk uitoan. Entaun ita husu sira para prenxe kompromisu obrigasaun sira ne’ebé ita atu halo ne’e para osan kuandu aprova ona ita hein atu selu de’it ona, ita labele halo projetu foun, no projetu foun ne’e hein orsamentu 2021 ninian”, hatete Ministru.
Ministru garante orsamentu 2020 séi ezekuta sein porsentu maski iha fulan rua nia laran transfere direita ona ba kada ministériu sira nia dívida no ATM sira ne’ebé mak iha ona, maibé projetu foun mak sei la halo no laiha.(Jornalista: Jaime Pires)
891 total views, 9 views today
