Timor Post (02/07/2020)- Primeiru Ministru no Ministru Interior Taur Matan Rauk Orienta Vise-Ministru Interior Antonio Armindo halo mudansa ba lei organika iha polisia imigrasaun nian iha semana ida laran.
“Ohin hasoru malu ho primeiru ministru no ministru interior atu simu orientasaun servisu nia hare liu ba lei orgánika ministériu interior nian, estatutu polisia nian no mós lei mudansa ba polisia imigrasaun ninian, no primeiru ministru no ministru interior orienta ona atu semana ne’e ita atu halo hodi lori mai aprezenta ona iha konsellu ministru no entrega ba iha gabinete primeiru ministru no ministru interior”, informa Antonio Armindo ba jornalista sira iha palasiu Governu kinta (02/07) lokraik ne’e.
Kona-ba lei dixiplinár ne’ebé konsellu ministru aprova ona iha semana kotuk liu ba nia parte seidauk lee detallu kona-ba lei ne’e maibé konsellu ministru aprova ona signifika apar ona ho situasaun no kondisaun ne’ebé mak iha.
Entaun bainhira nia parte atu halo estatutu ruma mós tenke halo apar ho lei dixiplinar PNTL nianne’ebé mak konsellu ministru aprova ona.
Antonio esplika katak sira mós iha ona planu no polítika atu dezenvolve instituisaun PNTL ne’e tanba sira nia parte mai ho filozofia ida polisia tenke servisu hanesan anju da guarda ba povu.
“Ha’u mós hatene durante públiku kestiona kona-ba polisia nia hahalok no servisu ne’e maibé hanesan instituisaun ha’u mai hodi hadi’a, la signifika atu sa’e diviza mak ba tuir formasaun lae maibé fó formasaun beibeik hodi sira bele hatene sira nia servisu, ne’ebé ha’u hanoin tinan rua ne’e ita sei hadi’a buat lubuk ida,” Nia hakotu.(Jornalista: Jaime Pires)
497 total views, 3 views today
Oinsa Ita nia Reaksaun iha Notisia Nee?
You have reacted on “PM Orienta Vise-MI Semana Ne’e Tenke Halo…”
