ADVERTISEMENT

Francisco Simoes Re-eleitu ba Konsilleru Konsellu Imprensa, Virgílio Apresia ho TLPU

Timor Post - Jeral
  • Share

Timor-Post (27/06/2020)—Francisco Simoes Belo da Costa ‘Quito Violet’, kontinua hetan konfiansa ba sai hanesan reprejentante jornalista sira nian iha Konsellu Imprensa (KI) ba Períodu 2020-2024  ho votus maioria  hosi konferesista Timor-Leste Press Union (TLPU), ne’ebé hala’o iha loron, Sábadu (27/06/2020),  iha Salaun Delta Nova-Dili.

Rejultadu eleisaun husi membru TLPU hamutuk 190 hatudu Quito Belo hetan ho votus hamutuk 116, Noémio Falcão hetan votus 35, Cándido Alves hetan votus 26, no kandidatu Horácio Babo 12 no votu nulu 1.

Hafoin eleisaun, Quito Violet hato’o nia agradesimentu ba konfiansa tomak ne’ebé fó ba nia no fó parabéns ba ninia adversáriu sira no husu atu kontinua servisu hamutuk ba defende direitu jornalista sira nian iha Timor Leste.

“Ha’u hakarak agradese ba apoiu fo mai ha’u hodi assume nafatin kargu ida ne’e. Segundu ha’u mos hakarak fo parabéns ba kolega kandidatu sira seluk, lakon ita lakon hotu, manan ita manan,” subliña eis Xefe Redasaun GMN no atuál editor iha Ajénsia Tatoli ne’e iha nia diskursu ikus.

Nia promete iha nia segundu mandatu sei kontinua servisu ne’ebé iha ona no kria parseiru di’ak liután ho jornalista hodi hamutuk defende liberdade imprensa no liberdade espresaun.

Entretantu Noemio Falcão nu’udar kandidatu segundo mais votadu subliña, jornlaista mak hanesan bee ne’ebé sai fator determinante ba haburas demokrasia. Tanba ne’e, nia lori membru tomak ne’ebé vota ba nia naran fó parabens ba Quito  Violet.

“Natureza demokrasia maka hanesan ne’e, minoria tenke submete ba maioria. Maibé importante liu tenke kontrola no fó hanoin ba malu nafatin atu defende ho lolo’os direitu jornalista sira nian,” Falcão afirma.

Iha fatin hanesan Prezidente TLPU, Manuel Pinto, hato’o ninia agradesimentu ba ekipa tékniku hosi KI ne’ebé fó apoia hodi realiza konferénsia ida ne’e,  no  mós agradese ba partisipasaun membru sira hotu nian.

Pinto promete, TLPU sei realiza kontratu ho reprezentante TLPU foun iha KI ne’e hodi asegura servisu tuir nesesidade ne’ebé iha.

“Ba konselleiru foun aprende, aprende nafatin hosi estrutura antigu atu responsabiliza servisu iha organizasaun nia laran. TLPU sei kontratu ho konselleiru atu halo servisu,” hatete atual Vise Prezidente Ajénsia Notísias Tatoli.IP ne’e.

Molok fó votu susesu, Pinto mós rekomenda atu konselleiru Quito Violet lori mós hanoin hosi adversáriu sira nian ne’ebé hato’o iha períodu kampaña konferénsia nia laran.

“Konsidera mós hanoin hosi adversáriu sira nian atu sai matan tilun no ibun ba TLPU. Dezeju Susesu” Pinto subliña.

Observasaun katak, akta hosi konferénsia ne’e prezidente meza konferénsia entrega  kedas ba Prezidente Konsellu Imprensa Virgilio Guterres, asiste direta hosi membru konselleiru sira seluk hanesan José Maria Ximenes, Hugo Maria Fernandes, Paulo Adriano da Cruz de Araújo inklui konsileiru re-eleitu Francisco Simoes Belo no kongresista sira.

Prezidente  KI, Virgílio da Silva Guterres ne’ebé partisipa iha konferénsia to’o remata, haksolok tanba haree konferensista sira aprende rona malu no simu rezultadu iha konferénsia ida ne’e.

“Ida ne’e sai ezemplu di’ak” apresia Virgílio.

Ba nia membru ne’ebé re-eleitu eis prezidente ONG Haburas ne’e fó parabéns prestíjiu tanba sira seluk hatene mandatu sei kontinua ka lae.

“Parabéns ba konselleiru eleitu maski ami sidauk hatene ami mandatu sei kontinua ka lae, maibé nafatin fó apoiu hodi garante mandatu rua hosi Konsellu imprensa hanesan garante liberdade editorial hosi media no defende informasaun ho moos no loloos ba públiku” dehan da Silva Guterres.

(Editor no Jornalista: Mariano Martins)

 1,119 total views,  3 views today

Oinsa Ita nia Reaksaun iha Notisia Nee?
Like
Love
Haha
Wow
Sad
Angry
You have reacted on “Francisco Simoes Re-eleitu ba Konsilleru Konsel…” A few seconds ago

Lee Mós :
Timor Post Tenke Kredivel

Bele hare Video Seluk :
  • Share
ADVERTISEMENT
SCROLL FILA BA NOTISIA

Notisia Timorpost Seluk


Komentariu :
Timorpost.com. Respeita tebes Ita Nia opiniaun. Laran luak no uza etika bainhira hatoo opiniaun. Opiniaun iha Ita Nia responsabilidsde, tuir lei ITE.

Varanda
Kategoria
Video
Buka
Watch
Facebook
error:
Simu Notifikasaun Hosi Timor Post Online! OK No