Timor Post (25/06/2020)- Sekretáriu Estadu Kooperativa (SECOOP) sesante Arsénio Pereira da Silva hatete, kinta (25/06) ofisialmente entrega pasta ne’e ba Elisário Ferreira iha edifísiu SEKOOP Akait-Dili.
Iha serimónia entrega no simu podér ne’e Arsénio husu deskulpa no husik lia menon ba funsionáriu Sekoop atu servisu hamutuk ho sekretáriu estadu foun.
“Ami sekretáriu estadu ne’e hanesan nomeasaun polítika, no ohin bele tun ka aban bele tun depende ba polítika iha ita nia rai laran, ne’ebé ami ohin sai ne’e laiha buat ida”, hateten Arsénio.
Governante demisionáriu hosi Partidu CNRT ne’e rekorde, tuir los mandatu to’o tinan lima maibé tanba polítika rai laran tenke la’o tuir.
“Governu hotu-hotu iha ninia mandatu ne’e tinan lima maibé ha’u nia mandatu tinan rua de’it tanba ita nia polítika mak hanesan ne’e ohin bele tun aban mós bele tun ida ne’e mak polítika” dehan Arsénio.
Ba sekretáriu estadu foun Arsénio husu kontinua servisu ne’ebé halo ona, no kontinua servisu hamutuk ho funsionáriu sira hotu hodi lori sekoop ba oin.
Molok hakotu Arsénio mós husu deskulpa ba funsionáriu, ba sala ne’ebé karik nia halo no, husu ba funsionáriu sira hodi kontinua servisu hamutuk ho sekretáriu estadu foun ho nia ekipa.(Jornalista: Jaime Pires)
644 total views, 3 views today
Oinsa Ita nia Reaksaun iha Notisia Nee?
You have reacted on “Entrega Pasta ba Elisário, Arsénio: “Ohin…”
