Timor Post (21/06/2020)-Observadór Polítika Universidade Dili (UNDIL), Hugo Lourenco, konsidera kulidade ema iha kompozisaun Governu atual aat liu kualidade ema iha kompozisaun iha governasaun seluk-seluk.
“Ema barak di’ak tebes-tebes (matenek), iha esperiénsia ba governa maibé ita la uza, ita uza fali ema sira ne’ebé mak ko’alia de’it Tetum mós ko’alia la sai ona, le de’it mós la hatene ba sai membru governu, ne’e ita komplikadu, ida ne’e mak susar”, hateten Hugo.
Akademista hatutan, kuandu ko’alia kona-ba prinsipiu The Right Man In The Right Place ne’e la iha tanba tau ema ba sai governante la hare ba kualidade (Méritu), tau de’it hodi asegura ukun.
“Governante balun la iha kapasidade maibé tanba atu asegura de’it ukun obriga Primeiru Ministru fó kargu maibe kualifikasaun at liu hotu hosi ita nia governasaun hosi Primeiru, Segundu Terseiru to’o mai agora” tenik Hugo ba Jornalista Timor Post, domingu.
Observador ne’e konklui katak ida ne’e sei difikulta mos mehi Xefe Governu nian atu lori povu ba moris di’ak.
“Oinsá maka Primeiru Ministru atu bele konkretiza ninia kompromisu eleitorál, hanesan nia kampaña ne’e, sé estrutura ida ne’e mai ho kualidade ida ke la iha, Primeiru Ministru ko’alia desizaun ida nia ministru halo fali buat seluk ida,” Katak nia.
Sorin seluk bainhira husu hanoin sobre pozisaun Ministru Interior ne’ebé tuir loloos assume hosi partidu KHUNTO nian maibé ikus pasta refere sei assume hosi Primeiru Ministru rasik no KHUNTO nia ema maka sei assume nu’udar Vise ministru Interior.
Akadémiku ne’e konsidera, ida hanesan ne’e hatudu momoos katak mezmu partidu Fretilín ba hamutuk hodi viabiliza governu ida ne’e maibé sira rasik la iha konfiansa ba malu.
“Entre sira la iha konfiansa mezmu sira hamutuk forma tiha governu, la iha konfiansa ba malu ne’e maka hatudu daudaun dada malu hela sé mak atu ba assume kargu ministru interior, hatudu ba públiku katak sira solid (Metin) maibé realidade lae sira labele la’o kleur (sei fahe malu) tanba labele asegura interese ba malu”.
Jornalista: Julio Salinas Soares
Editr: Mariano Martins
756 total views, 3 views today
Bele hare Video Seluk :