Timor Post (18/06/2020)—Xefe Estadu Francisco Guterres Lú Olo ho Xefe Governu Taur Matan Ruak, deskuti assuntu tolu iha reuniaun seminal iha loron Kinta (18/06/2020), iha Palásiu Prezidensiál, Bairro-pité, Dili.
Assuntu tolu ne’e dahuluk liu kona-ba situasaun seguransa iha rai laran ne’ebé konsideradu ein-jerál kontroladu, maibé iha sidadaun na’in-13 inklui husi nasaun Vietnam na’in-11 inklui feto na’in tolu ho sidadaun Indonézia na’in-rua, ne’ebé ho ró tama iha tasi illa Jako-Tutuala, iha loron Kinta kalan (11/06/2020).
Hafoin sorumutu, Taur ba Jornalista sira subliña, ho Lú Olo ko’alia kona-ba oinsá prosesu deportasaun.
“Vietnam sira ne’ebé ita kaptura na’in-11 ho Indonézia na’in-2, que agora daudaun ne’e ita trata hela, haree hela para halo nusa maka haruka sira fila-fali ba sira nia rain,” Taur hatete.
Sidadaun estranjeiru hirak ne’e, peskador sira hetan no Ekipa Sentru Integradu Jestaun Krize (SIJK) ba COVID-19 akompaña husi parte seguransa evakua ona ba Dili iha loron 13/06/2020 hodi halo investigasaun.
Kona-ba teste ba sira nia saúde liga ho moras COVID-19, parte SIJK fo sai ona iha loron hirak liu ba katak negativu hotu.
Assuntu seluk ne’ebé deskuti maka pagamentu subsídiu sira ne’ebé halo, daudaun ne’e buat hotu la’o di’ak até horisehik lokraik entre 298 mil resin ita selu ona 231 mil ne’ebé iha loron hirak mai tan xefe governu garante katak hotu ona.
Assuntu ikus maka “Ha’u ko’alia uitoan kona-ba ita nia sidadaun sira ka traballadór sira ne’ebé iha Austrália no iha Korea ne’ebé sira nia kontratu hotu que ita haree hela halo nusa mak evakua sira. Tanba ne’e ohin asuntu tolu ne’e mai informa ba prezidente repúblika iha enkontru semanál ohin loron ne’e,” Taur subliña.
Kestiona kona bá problema ne’ebé mosu iha distribuisaun subsídiu Xefe Governu hatete ne’e foin primeiru Timor-Leste halo, entaun problema sira ne’e depois prosesu pagamentu ne’e remata sei hadi’a inklui reklamasaun sira ne’e hotu.
Jornalista: Jaime Pires
962 total views, 3 views today
Bele hare Video Seluk :