Timor Post (15/06/2020)-Membru Organizasaun Ra’es Hadomi Timoroan (RHTO) iha Munisípiu Covalima, Honório Gusmão, afirma Governu loloos tau atensaun espesiál ba ema ho defisiénsia iha situasaun estadu emerjénsia, tanba ema hirak ne’e vulneravel.
Gusmão haree ema ho defisiénsia menus partisipa iha distribuisaun subsídiu $ 100 kompara ho ema uma kain normal sira tanba de’it seidauk forma uma kain.
“Sente triste bainhira haree maluk sira ne’ebé moris ho defisiénsia ladún partisipa másimu atu hetan subsídiu ida ne’e. Loloos sira ho situasaun estadu emerjénsia ne’e governu tenke haree mós ba sira hotu, tanba iha situasaun estadu emerjénsia halo ema ho defisiénsia sai vulneravel liután”, hateten Gusmão ba Timor Post bainhira observa distribuisaun subsídiu ba ema ho defisiénsia sira iha Aldeia Fatuk Oan, Suku Holpilat, Postu Administrativu, Maukatar, Munisípiu Kovalima.
Honório husu ba governu atu tau atensaun moos ba maluk sira ne’e iha situasaun ida hanesan ne’e vulneravel liután.
“Sira moris ho defisiénsia barak maibé tanba sira barak seidauk harii uma kain sira barak la hetan direitu ba subsídiu, ida ne’e triste”, espresa Gusmão.
Jornalista: Julio Salinas
Editor: Mariano Martins
1,800 total views, 15 views today
Bele hare Video Seluk :